Qılıncoynatma millimiz İslamiadanı 4 medalla bitirdi

Qılıncoynatma üzrə Azərbaycan millisi Səudiyyə Ərəbistanında təşkil edilmiş 6-cı İslam Həmrəyliyi Oyunlarında uğurlu çıxış edib.

Arena.az xəbər verir ki, ilk yarış günündə qılıncoynatmanın sablya növü üzrə qadınların və şpaqa növü üzrə kişilərin şəxsi yarışında mükafatçılar müəyyənləşib.

Sablya üzrə qadınların şəxsi yarışında Palina Kaspiaroviç, şpaqa üzrə kişilərin şəxsi yarışında isə Vahab Fətullayev bürünc medal qazanıblar.

Qrup mərhələsini 4 qələbə ilə başa vuran Vahab yarımfinala gedən yolda Qətər və Qırğızıstan qılıncoynadanlarını mübarizədən kənarlaşdırıb. Şpaqaçımız finalın bir addımlığında özbəkistanlı Javokhirbek Nurmatova 11:15 hesabı ilə uduzub.

Qrup mərhələsini 4 qələbə ilə bitirən Palina Kaspiaroviç qadın sablyaçıların şəxsi yarışında 1/4 finalda Türkiyə təmsilçisinə qalib gəlib. Palina gərgin mübarizə şəraitində keçən yarımfinal görüşündə Özbəkistan sablyaçısı Gülistan Perdebaevaya 12:15 hesabı ilə uduzub.

Xədicə Həsənli, Aynur Quliyeva, Nazilə Rəhimova və Nəzrin Mehdiyevadan ibarət qılıncoynatmanın şpaqa növü üzrə qadınlardan ibarət millimiz isə komanda yarışında 1/4 finalda BƏƏ yığmasına 45:29 hesabı ilə qalib gəlib. Yığmamız gərgin keçən yarımfinal görüşündə Özbəkistan komandasına 38:39 hesabı ilə uduzub. Beləcə, gənc şpaqaçı qızlarımız ilk dəfə qatıldıqları böyüklərin turnirində bürünc medala layiq görülüblər.

Qılıncoynatmanın sablya növü üzrə qadınlardan ibarət Azərbaycan millisi isə ardıcıl olaraq ikinci dəfə İslam Həmrəyliyi Oyunlarında qızıl medal qazanıb. Yarımfinalda Türkiyə millisinə 45:32 hesabı ilə qalib gələn Zərifə Hüseynova, Səbinə Kərimova və Palina Kaspiaroviçdən ibarət komandamız gərgin keçən final qarşılaşmasnda Özbəkistan yığmasını 45:43 hesab ilə məğlub edib.

Beləcə, qılıncoynatma üzrə milli komandamız 6-cı İslam Həmrəyliyi Oyunlarında 1 qızıl və 3 bürünc medal qazanıb.