BAKI, 24 noyabr. TELEQRAF
Oktyabr ayında İranın müxtəlif həbsxanalarında azı 286 nəfər edam edilib. Bu statistika göstərir ki, təkcə son ayda İranda gündə orta hesabla təxminən 10 nəfər, hər iki saat yarımda isə bir nəfər asılıb.
Teleqraf xəbər verir ki, bu barədə HRANA-nın hesabatında bildirilib.
Oktyabrda 268 edam hökmü icra olunub, 9 edam hökmü çıxarılıb, 8 edam hökmü isə təsdiqlənib.
Barəsində hökm icra edilənlərdən biri noyabrın 20-də Yəsuc şəhərində Həft-Tir meydanında ictimai şəkildə dara çəkilib. İran Psixiatriya Həkimləri Elmi Assosiasiyası Baş prokuror Qulamhüseyn Möhsün-Ejeiyə məktub yazaraq ictimai edamların geniş psixoloji və sosial fəsadlarına diqqət çəkib və bu praktikanın dərhal dayandırılmasını tələb edib.
Qeyd olunub ki, son aylar İranda edamların fasiləsiz artması beynəlxalq təşkilatlarda ciddi narahatlıq yaradıb və ölkə daxili və xaricində geniş etirazlara səbəb olub.
HRAANA həmçinin əlavə edib ki, son bir ildə İranda azı 1537 nəfər edam edilib.
