Böyük Britaniyanın Kralı Çarlz III-in qardaşı Endryu Mauntbətən-Vindsor ABŞ maliyyəçisi Ceffri Epşteynlə əlaqələri ilə bağlı Konqresdə ifadə vermək üçün göndərilən çağırışı nəzərə almayıb.
AFN.az xəbər verir ki, bu barədə "The Times" məlumat yayıb.
Bildirilir ki, ABŞ Nümayəndələr Palatasının demokrat üzvləri Endryuya Epşteynlə əlaqələrini araşdıran proses çərçivəsində rəsmi ifadə çağırışı göndəriblər. Cavab üçün son tarix 20 noyabr olsa da, Endryu Mauntbətən-Vindsor Konqresin çağırışına reaksiya verməyib. Palatanın üzvü Suhas Subramanyam bildirib: “O, bizdən gizlənir və hesab edirəm ki, ciddi araşdırma aparanlardan qaçmağa davam edəcək. Ümid edirəm ki, kralın qardaşına yaxın şəxslər Konqresə vacib məlumatları təqdim edə biləcəklər.”
"The Times"in yaydığı məktubdan sitatlarda qeyd olunur ki, Endryu 1999-cu ildən etibarən Epşteynlə yaxın münasibətlər saxlayıb, onun Nyu-Yorkdakı və şəxsi adasındakı rezidensiyalarına gedib. Qəzet 2011-ci ildə Endryunun Epşteynə yazdığı elektron poçtu vurğulayır: “Biz bunu birlikdə edirik.” Bu, şahzadənin Epşteyn və tərəfdaşları barədə əhəmiyyətli məlumatlara malik olduğunu göstərir.
Qeyd olunur ki, Nümayəndələr Palatası Endryuya rəsmi çağırış göndərə bilmir, çünki o, ABŞ vətəndaşı deyil. Bundan əlavə, Respublikaçı partiya demokratların bu təşəbbüsünü dəstəkləməyib, nəticədə çağırışın Britaniya kralının qardaşına təsiri olmayıb.
