Milli Məclisin plenar iclasında çıxış edən deputat Sahib Alıyev sosial sığorta sisteminin davamlılığının təmin edilməsində özünü maliyyələşdirmə prinsipinin əsas rol oynadığını bildirib.
"Operativ Məlumat Mərkəzi-OMM"-in xəbərinə görə, deputat qeyd edib ki, Dövlət Sosial Müdafiə Fondunun dövlət transferlərindən asılılığının azaldılması istiqamətində atılan addımlar əhəmiyyətlidir, lakin bu prosesin tam təmin olunması hökumətin qarşısında duran mühüm vəzifələrdən biri kimi nəzərdə tutulmalıdır.
Sahib Alıyev vurğulayıb ki, qeyri-büdcə sektorunda sığorta ödənişlərinin əhatə dairəsinin genişləndirilməsi, kölgə məşğulluğunun azaldılması və uçot sisteminin tam şəffaflaşdırılması sosial sığorta sisteminin dayanıqlığını gücləndirəcək vacib addımlardır.
Deputat çıxışında ölkədə demoqrafik dəyişikliklərə də diqqət çəkib. Onun sözlərinə görə, əhalinin yaş strukturu və əmək qabiliyyətli şəxslərlə pensiyaçıların nisbətində baş verən dəyişikliklər gələcəkdə pensiya sisteminin yükünü artıracaq:
“Demoqrafik risklər əvvəlcədən nəzərə alınmalı, uzunmüddətli proqnozlaşdırma modelləri hazırlanmalı və qərarlar bu çərçivədə qəbul edilməlidir”.
Sahib Alıyev bildirib ki, bu məsələlərə vaxtında müdaxilə pensiya sisteminin uzunmüddətli maliyyə tarazlığını qorumağa imkan verəcək.
Afət Ziyadqızı
