İki yaşlı uşaq zəhərli kubomeduzanın sancmasından ölüb.
İnterpress.az xəbər verir ki, bu barədə Rusiya mediası məlumat yayıb.
Rusiyanın Xabarovsk şəhərindən olan ailə Malayziyanın Langkavi adasında istirahət edərkən faciə ilə üzləşib.
Dənizdə çimən zaman iki yaşlı Vovanı kubomeduza sancıb və uşaq ağrıdan qışqırıb.
Valideynlər onu dərhal sudan çıxarsalar da, uşaq sahildə artıq nəfəs almırdı. Ata dərhal ürək-ağciyər reanimasiyasına başlayıb.
Hadisə yerində olan turistlər və xilasedicilər də köməyə gəliblər — yaraya sirkə tökülüb və uşaq təcili şəkildə xəstəxanaya çatdırılıb.
Vova dörd gün reanimasiyada kritik vəziyyətdə saxlanılıb, lakin həkimlər onun həyatını xilas edə bilməyiblər.
Ailə uşağın cənazəsini Malayziyada kremasiya etdirməyi, daha sonra isə külünü vətənə aparmağı planlaşdırır.
Qeyd olunur ki, kubomeduzaların 3 metrə çatan uzunluqdakı çadırlarında milyonlarla nematosit olur və bu hüceyrələrin zəhəri insan üçün ölümcül ola bilər.
Xuraman Etibarlı
İnterpress.az
