Son günlər ölkədə uşaqlar arasında qızdırma, halsızlıq və öskürəklə müşahidə olunan virus infeksiyalarının artması narahatlıq doğurur. Valideynlər xüsusilə məktəb və bağçalarda sürətli yoluxma hallarının çoxaldığını bildirirlər. Xəstəliyin simptomları yüngül görünsə də, vaxtında müdaxilə olunmadıqda vəziyyət ağırlaşa bilər. Bəs uşaqlar bu virusdan necə qorunmalıdır?
Mövzu ilə bağlı Missiya.Az-a danışan pediatr Gülnar Abdullayeva bildirib ki, uşaqları viruslardan qorumağın əsas yolu onların immunitetini güclü saxlamaqdır.
Həkimin sözlərinə görə, immuniteti möhkəmləndirmək üçün ilk növbədə pediatr tərəfindən aparılan ümumi qan analizi, dəmir, kalsium və vitamin göstəriciləri normada olmalıdır:
"Uşaqlar düzgün qidalanmalı, gündəlik rasionda tərəvəz, meyvə və bol göyərti mütləq yer almalıdır. Uşaqlar günəşli havada vaxt keçirməli, gün ərzində ən azı iki saat təmiz havada olmalıdırlar. Günəşlə təması az olan uşaqlara isə D vitamini əlavə olaraq verilməlidir, çünki bu vitamin immun sisteminin gücləndirilməsində mühüm rol oynayır".
Pediatr əlavə edib ki, normal qidalanma, kifayət qədər yuxu, müntəzəm havalandırılan mühit və insanların sıx olduğu məkanlardan uzaq durmaq viruslardan qorunmada əsas şərtlərdəndir.
Seyranə QuliyevaMissiya.Az
