“OpenAI” şirkəti çat-botun “GPT‑5.1 Instant” və “GPT‑5.1 Thinking” versiyalarını təqdim edib. Tərtibatçılar bildiriblər ki, yeni model həm daha “ağıllı”, həm də ünsiyyətdə daha “xoşməramlı” olub.
“GPT-5.1 Instant” modeli əvvəlkindən daha “söhbətcil” xarakterə malikdir, lakin cavabları aydın və faydalıdır. Şirkət həmçinin çat-botun istifadəçi təlimatlarına daha dəqiq əməl etmək bacarığını yaxşılaşdırıb. Model cavab verməzdən əvvəl nə vaxt “düşünmək” lazım olduğunu özü müəyyən edir ki, bu da ona daha dolğun və dəqiq nəticə təqdim etməyə imkan verir.
“GPT-5.1 Thinking” isə sorğunun mürəkkəbliyindən asılı olaraq “düşünməyə” nə qədər vaxt sərf etməyi daha yaxşı müəyyənləşdirməyi öyrənib. Modelin cavabları indi daha anlaşıqlıdır və daha az miqdarda jarqon və qeyri-müəyyən terminlərdən ibarətdir.
Şirkət həmçinin “ChatGPT”nin cavab üslubu parametrlərini yeniləyib. Qalmaqda olan üslublar: “Standart” (Default), “Dostyana” (Friendly, əvvəllər Listener), “Effektiv” (Efficient, əvvəllər Robot), “Sinik” (Cynical) və “Darıxdırıcı” (Nerdy). Onlara əlavə olaraq yeni üslublar təqdim edilib: “Peşəkar” (Professional), “Səmimi” (Candid) və “Qəribə” (Quirky).
“GPT-5.1 Instant” və “GPT-5.1 Thinking” yeniləməsi 2025-ci il 12 noyabrdan etibarən bir neçə gün ərzində mərhələli şəkildə təqdim ediləcək, əvvəlcə Pro, Plus, Go və Business abunəçiləri üçün. Daha sonra yeniləmə pulsuz istifadəçilər üçün də əlçatan olacaq. Tezliklə “GPT-5.1 Pro” versiyasının da çıxacağı gözlənilir.
