12 noyabr 2025-ci il tarixində Prezident İlham Əliyev Naxçıvanda Prezidentin yeni səlahiyyətli nümayəndəsini və bir sıra rayonların icra hakimiyyətlərinə təyin olunan başçıları qəbul edib.
Dövlət başçısının çıxışı həm yeni təyinat alan məmurlara strateji istiqamət göstərdi, həm də son illərdə aparılan islahatların mahiyyətini bir daha nümayiş etdirdi.
Musavat.com xəbər verir ki, Prezidentin çıxışı bir növ dövlət idarəçiliyində yeni mərhələnin konturlarını cızdı — şəffaflıq, xalqa xidmət və sosial ədalət prinsipi bu siyasətin əsas dayaqları kimi ön plana çəkildi.
Xalqa xidmət – idarəetmənin təməl prinsipi
Prezident İlham Əliyev çıxışının əvvəlində vurğuladı ki, hər bir rəhbər vəzifəli şəxs xalqa xidmət etməyi özünün əsas missiyası hesab etməlidir. O, yeni təyin olunan rəhbərlərə xatırlatdı ki, “xalqa yaxın olmaq, xalqla bir yerdə olmaq” idarəçiliyin başlıca qayəsidir. Bu, Prezidentin illərdir davam etdirdiyi “xalq dövləti” modelinin praktik ifadəsidir. Məhz bu prinsip sayəsində dövlət orqanları ilə vətəndaş arasında etimad körpüsü daha da möhkəmlənib.
Məmur təvazökarlığı və korrupsiyaya qarşı qəti mövqe
Prezident çıxışında məmur davranışının əhəmiyyətinə xüsusi toxundu. O, dövlət qulluqçularının təkəbbür və lovğalıqdan uzaq, təvazökar olmasını tələb etdi: “Məmur özünü xalqdan üstün tutmamalıdır".
Dövlət başçısı eyni zamanda bir daha xatırlatdı ki, korrupsiya və rüşvətxorluğa qarşı mübarizə qətiyyətlə davam etdiriləcək və “heç bir qanunsuz hərəkət nəticəsiz qalmayacaq".
Bu mesaj İlham Əliyevin rəhbərliyi ilə son illərdə aparılan kadr islahatlarının davamı kimi səsləndi. Artıq bir çox yüksək vəzifəli şəxslərin məhkəmə qarşısında cavab verməsi, dövlət sistemində “özünütəmizləmə” prosesinin reallığını sübut edir.
Prezident İlham Əliyev çıxışında qeyd etdi ki, son illərdə həyata keçirilən regional inkişaf proqramları nəticəsində ölkənin infrastruktur siması tam dəyişib. Bütün bölgələrdə elektrik enerjisi təchizatı, yollar, su layihələri və sosial obyektlər yüksək səviyyədə yenilənib. Dövlət başçısının sözləri ilə desək, “Azərbaycanın bölgələrində bu gün hər bir şəhərdə müasir xəstəxana fəaliyyət göstərir, kənd yollarının 80 faizi təmirlidir”.
Bu faktlar Prezidentin uzun illər ərzində həyata keçirdiyi dayanıqlı regional siyasətin konkret nəticələridir. O, təkcə paytaxtın deyil, ucqar kəndlərin də inkişafını dövlət siyasətinin mərkəzinə gətirib.
Sosial ədalət və sağlam kadr siyasəti
Prezidentin çıxışında sosial ədalət anlayışı xüsusi yer tutdu. O bildirdi ki, “hər bir bölgədə insanlar görməlidirlər ki, ədalət hər zaman üstünlük təşkil edir”.
İlham Əliyev vurğuladı ki, əvvəllər bəzi mərkəzi orqanlarda baş vermiş xoşagəlməz hallara qarşı artıq ciddi təmizlənmə aparılıb və bu gün dövlət aparatında ədalət və məsuliyyət prinsipi bərqərar olub.
Məşğulluq və sahibkarlığın inkişafı – yeni prioritet
Dövlət başçısı bölgələrdə məşğulluğun təmin edilməsini əsas prioritetlərdən biri kimi qeyd etdi. Prezident bildirdi ki, dövlət proqramları çərçivəsində yeni müəssisələr yaradılır, sahibkarlara güzəştli kreditlər verilir, özünüməşğulluq proqramı genişləndirilir. Bu addımlar həm regionların iqtisadi potensialını artırır, həm də miqrasiyanın qarşısını alır.
Prezident İlham Əliyev ekologiya məsələlərinə də toxundu. O, Bakının və Sumqayıtın “ekoloji fəlakət zonası” statusundan çıxarılaraq parklar şəhərinə çevrildiyini qeyd etdi. “Qara şəhəri Ağ şəhərə çevirdik” ifadəsi bu siyasətin simvoluna çevrildi. Dövlət başçısı bölgələrdə də qanunsuz fəaliyyətin qarşısının alınması, təbiətin qorunması istiqamətində sərt tədbirlərin görüləcəyini bildirdi.
Prezident İlham Əliyevin səsləndirdiyi bu fikirlər bir daha göstərdi ki, Azərbaycan dövlət idarəçiliyi sistemində şəffaflıq, ədalət və xalqla birbaşa təmas əsas hədəflər olaraq qalır. İlham Əliyev həm siyasi, həm iqtisadi, həm də mənəvi baxımdan ölkənin inkişafını koordinasiya edən lider kimi çıxış edir.
Onun sözləri ilə desək, “etimadı doğrultmaq, xalqa xidmət etmək, xalqın rəğbətini qazanmaq” hər bir rəhbərin borcudur. Bu, təkcə tapşırıq deyil — bu, Prezident İlham Əliyevin müəyyən etdiyi müasir Azərbaycan idarəçilik fəlsəfəsidir.
Musavat.com
