Misli premyer-liqasının 11-ci turunda “Qəbələ” evdə “Sumqayıt”a məğlub oldu - 0:2.
“Football-plus.az” “qırmızı-qaralar”ın baş məşqçisi Kaxaber Sxadadzenin oyunsonrası mətbuat konfransından hesabatı təqdim edir.
- “Sumqayıt”ı təbrik edirəm. Nəsə demək çətindi. Azarkeşlərdən üzr istəyirəm. Hər halda, məşqçi günahkardı. Qol şanslarından yararlana bilmirik. Başa düşə bilmirəm ki, elə epizodda necə əllə oynamaq olar. Hər dəfə bir-iki kobud səhv oyunun taleyini həll edir. Mən heç kimdən zəif görünmək istəmirəm.
- Futbolçular haqda demişdiz ki, premyer-liqa səviyyəsində deyillər. Bunu futbolçular da eşidib. Onları necə motivasiya edirsiz?
- Mən bu sözləri ehtiyatda olan futbolçular haqda demişəm. Premyer-liqa təcrübələri çatmır. Səviyyə yox, təcrübə çatmır demişəm. Domi 1-ci liqada bombardir olub. Futbolçuların, sadəcə, elita təcrübəsi çatmır. 18 yaşda oynayırsansa, bundan böyük motivasiya ola bilməz. Baxış elə olmalıdı ki, özünüzü öldürməlisiz. Məşqçi18 yaşında səni oyuna çıxarır.
- Asif Məmmədovun fiziki durumu nə yerdədi?
- O klubumuzun əfsanəsidi. Məşqçilər korpusunda bizə kömək edir. Yaxşı oğlandı.
- Əvvəl qol vurub uduzurduz, indi qol vurmaq da alınmır…
- Məni narahat edir. Nə qədər qol vəziyyəti yaradırıq. Yaratmasaydıq, bu bizi narahat edər. Saşa İliç də komandamız haqda nə qədər yaxşı sözlər dedi. Prins 5 metrdən ötürmə verə,Domi boş qapıya düşə bilmədi.
- Mövsümün əvvəlində bu durumda olacağınızı düşünürdüz?
- Təbii ki, yox. Amma hədəfimiz elitada qalmaq idi. Nəyisə atıb getmək asandı. Söz vermisənsə, əməl etmisən. Bir daha azarkeşlərdən üzr istəyirəm. Qışda güclənməliyik.
- Hər konfansda deyirsiz ki, futbolçularda təcrübə yoxdu. Axı yayda heyəti siz qurmusuz. İki təcrübəli futbolçu var - Səlahət və Murad.
- Razıyam. Amma bu məsələyə toxunmuşam. Bu söhbəti bağlayaq, qışa qədər dözməliyik.
MÜZƏFFƏR QULUZADƏ
