Demokratlar Böyük Britaniya kralının qardaşını ABŞ Konqresində dindirilməyə çağırıblar...
Poliqon xəbər verir ki, “The Washington Post”un məlumatına görə, ABŞ Nümayəndələr Palatasının Nəzarət Komitəsindəki demokrat üzvlər Böyük Britaniya kralı III Karlın qardaşı, titullarından məhrum edilmiş şahzadə Endrüdən maliyyəçi-cinayətkar Ceffri Epşteyn işi üzrə ifadə verməsini istəyiblər.
Komitənin baş demokrati Robert Qarsia şahzadə Endrünün “Epşteynin cinayət şəbəkəsindəki əlaqələr və mümkün köməkçilər barədə” məlumat vermək üçün Konqres qarşısına çıxmasını tələb edib. Onun təşəbbüsü ilə imzalanan və 13 demokrat tərəfindən təsdiqlənən məktubda qeyd olunur ki, məqsəd Epşteynin cinayətlərinə cəlb olunan şəxsləri müəyyənləşdirmək və hadisələrin real miqyasını ortaya çıxarmaqdır. Şahzadə Endrüyə məktuba cavab üçün 20 noyabr tarixinədək vaxt verilib.
Xatırladaq ki, oktyabrın 30-da Böyük Britaniya kralı III Karl qardaşını bütün titullarından və şərəf nişanlarından məhrum edib, onu kral iqamətgahından çıxarmaq barədə qərar verib. Kral həmçinin şahzadəyə Vindzor parkındakı “Royal Lodge” malikanəsini tərk etməsi və başqa şəxsi mənzilə köçməsi barədə rəsmi bildiriş göndərib.
Bu qərarlar şahzadə Endrüyə qarşı təzyiqlərin artması fonunda qəbul olunub. Təzyiqlərin əsas səbəbi onun ABŞ-da azyaşlılarla cinsi istismar şəbəkəsi yaratmaqda ittiham olunan Ceffri Epşteynlə əlaqələridir.
Poliqon.info
