“Çelsi” Bakıda meydana buraxdığı heyətlə tarixə düşüb

“Çelsi” futbol üzrə UEFA Çempionlar Liqasının (ÇL) səfər matçlarında meydana ən gənc heyətlə çıxan ikinci İngiltərə komandası olub.

Arena.az xəbər verir ki, London təmsilçisi bunu Bakıda “Qarabağ”a qarşı keçirdikləri əsas mərhələnin 4-cü turunun oyununda gerçəkləşdirib.

Ötən gecə baş tutmuş bu qarşılaşmada “zadəganlar”ın ilk “11-liy”inin yaş ortalaması (23 yaş 97 gün) tarixə düşüb.

Bu, yalnız 2009-cu ildə Yunanıstanda “Olimpiakos”la qarşılaşmış “Arsenal”ın göstəricisindən geri qalıb. “Topçular”da həmin vaxt yaş ortalaması 21 yaş 215 gün olub.

Xatırladaq ki, “Qarabağ” – “Çelsi” görüşü 2:2 hesabı ilə başa çatıb. Tofiq Bəhramov adına Respublika stadionunda keçirilmiş oyunda hesabı qonaqlar açıblar. Amma “Qarabağ” elə ilk hissədə 2 qol vurmaqla hesabda önə keçib. İngiltərə təmsilçisi fasilədən sonra məğlubiyyətdən xilas olmağı bacarıb. Beləcə, Azərbaycan çempionu tarixi uğura imza ataraq ilk dəfə İngiltərə Premyer Liqası təmsilçisindən xal almağı bacarıb.

Xəbəri istədiklərinizlə paylaşın