COVID-19 diaqnozu qoyulmuş uşaq və yeniyetmələrin nadir ürək-damar və iltihabi ağırlaşmalar riski xeyli yüksək və uzunmüddətlidir.
Bunu yeni araşdırma müəyyən edib. Eyni zamanda, COVID-19 peyvəndi ürəyin iltihabı riskini yalnız qısamüddətli dövrdə artırır.
“Cebheinfo.az” xəbər verir ki, araşdırma “The Lancet Child & Adolescent Health” jurnalında dərc olunub. O, 1 yanvar 2020-ci illə 31 dekabr 2022-ci il tarixləri arasında İngiltərədə 18 yaşdan kiçik təxminən 14 milyon uşaq və yeniyetməni üzərində aparılıb.
Bu müddət ərzində təxminən 3,9 milyon uşağa ilk dəfə COVID-19 diaqnozu qoyulub və təxminən 3,4 milyon uşağa BNT162b2 peyvəndi (Pfizer-BioNTech) edilib.
Alimlər infeksiya və ya peyvənddən sonra beş nadir ağırlaşmanın - arterial və venoz tromboz, trombositopeniya (trombosit sayının aşağı olması), miokardit və ya perikardit və iltihabi vəziyyətlərin riskini müqayisə etmək üçün elektron tibbi qeyd məlumatlarını təhlil ediblər.
Risk infeksiyadan sonrakı ilk dörd həftədə ən yüksək həddə olub və bəzi ağırlaşmalar üçün 12 aya qədər yüksək qalıb. Peyvənddən sonra miokardit və ya perikardit halları yalnız ilk dörd həftədə müşahidə edilib və bundan sonra risk ilkin vəziyyətinə qayıdıb.
Tədqiqatçılar altı ay ərzində COVID-19 keçirmiş uşaqlar və yeniyetmələrdə hər 100000 nəfərə əlavə 2,24 miokardit və ya perikardit halının olduğunu müəyyən ediblər. Peyvənd olunmuş qrupda isə hər 100000 nəfərə cəmi 0,85 hal olub. Müəlliflər vurğulayırlar ki, mütləq risklər aşağı olsa da, məlumatlar infeksiyanın peyvənddən daha uzun və ciddi risk daşıdığını göstərir.
Müəlliflər qeyd edirlər ki, bu tapıntılar valideynlərə, baxıcılara və səhiyyə işçilərinə etibarlı məlumatlara əsaslanaraq qərarlar qəbul etməyə kömək edə bilər.
