“Papa John’s” şirkətinin səhmləri çərşənbə axşamı təxminən 20% dəyər itirib.
Marja xəbər verir ki, bu, “Apollo Global” investisiya şirkətinin pizza şəbəkəsini özəlləşdirmək təklifini geri çəkməsi barədə yayılan məlumatdan sonra baş verib.
“Reuters”in xəbərinə görə, özəl kapital şirkəti təxminən bir həftə əvvəl hər səhm üçün 64 dollar dəyərində qiymətləndirilən təklifini geri götürüb. Məlumata əsasən, “Apollo” bu təklifi daha əvvəl “Irth Capital Management” şirkəti ilə birlikdə vermişdi.
Həm “Apollo Global”, həm də “Papa John’s” məsələ ilə bağlı açıqlama verməkdən imtina ediblər.
Qeyd edək ki, “Papa John’s” cümə axşamı üçüncü rübün maliyyə hesabatını açıqlamağa hazırlaşır. Şirkətin səhmləri son bir ildə təxminən 30% dəyər itirib.
