Səudiyyə Ərəbistanının “Aramco” şirkəti çərşənbə axşamı üçüncü rüb üzrə mənfəətinin 0,9% artdığını bildirib.
Marja.az xəbər verir ki, bu artım, neft qiymətlərinin təzyiq altında qalmasına baxmayaraq, hasilatın çoxalması hesabına gözləntiləri üstələyib.
Dünyanın ən iri neft şirkəti olan “Aramco”, hesabat dövründə 104,92 milyard Səudiyyə rialı (27,98 milyard dollar) həcmində xalis gəlir əldə edib. Analitiklərin proqnozuna görə, bu rəqəm 98,47 milyard rial olmalı idi.
Bu nəticələr, ilin əvvəlindən bəri neft qiymətlərinin zəifləməsi fonunda şirkətin mənfəət marjasının daralması şəraitində əldə olunub. Neftin qiyməti sentyabra qədər 6%-dən çox azalıb. İkinci rübdə İsrail və İran arasındakı gərginliklər səbəbindən qısamüddətli artım istisna olmaqla, bazarda eniş tendensiyası müşahidə olunub.
FactSet məlumatlarına əsasən, ABŞ-ın West Texas Intermediate (WTI) markalı neftinin qiyməti bu ilin əvvəlindən 16%-dən çox, Brent markalı neftin qiyməti isə 12%-dən çox aşağı düşüb.
“Biz hasilatı minimal əlavə xərc ilə artırdıq və müştərilərimizin etibar etdiyi neft, qaz və əlaqəli məhsulların sabit tədarükünü təmin etdik. Bu da güclü maliyyə nəticələrinə və rüblük mənfəət artımına gətirib çıxardı,” — deyə Aramco-nun baş icraçı direktoru Amin Nasser bildirib.
Üçüncü rübün digər əsas göstəriciləri:
Rüblük gəlir 418,16 milyard rial olub, bu da analitiklərin 411,26 milyard rial proqnozunu üstələyib.
Şirkətin xalis borcu 114,33 milyard rial təşkil edib, bu da əvvəlki rübdəki 115,59 milyard rialdan bir qədər azdır.
Nağd pul axını (free cash flow) bir il əvvəlki 22 milyard dollardan 23,6 milyard dollara yüksəlib.
Şirkətin Direktorlar Şurası 2025-ci il üçün 21,1 milyard dollarlıq baza dividendi və 0,2 milyard dollarlıq performansa bağlı dividendi dördüncü rübdə ödənilmək üzrə təsdiqləyib.
Həftəsonu OPEC+ dekabr ayı üçün hasilatı cüzi artırmaq barədə qərar qəbul edib və gələn ilin ilk rübündə əlavə artımları dayandıracağını açıqlayıb. Kartel üzvləri dekabr üçün hasilat hədəfini gündəlik 137 min barel artırmaq barədə razılığa gəliblər.
Apreldən bəri OPEC+ hasilat hədəflərini təxminən 2,9 milyon barel/gün artırıb, lakin oktyabrdan etibarən bazarda potensial artıqlıq səbəbindən artım tempini azaldıb.
Eyni zamanda, Qərbin Rusiyaya qarşı yeni sanksiyaları OPEC+-ın hasilat strategiyasına çətinliklər yaradır. ABŞ-ın “Rosneft” və “Lukoil” kimi aparıcı Rusiya neft şirkətlərinə tətbiq etdiyi məhdudiyyətlər Moskvanın hasilatı artırmaq imkanlarını azaldıb.
Bundan başqa, Aramco yaxınlarda “Petro Rabigh” şirkətində 22,5%-lik payı Yaponiyanın “Sumitomo Chemical” şirkətindən 701,8 milyon dollara alaraq, ümumi payını təxminən 60%-ə çatdırıb.
Şirkət, həmçinin Səudiyyə Ərəbistanının İctimai İnvestisiya Fonduna (PIF) məxsus süni intellekt şirkəti HUMAIN-də azlıq payı əldə edib.
Amin Nasser qeyd edib ki, “HUMAIN”-dəki pay innovasiyaları dəstəkləyəcək və şirkətin “sürətlə inkişaf edən süni intellekt sektorundakı rolunu gücləndirəcək.”
