Vyetnamın mərkəzi hissəsində leysan yağışların yaratdığı şiddətli daşqınlar nəticəsində ölənlərin sayı 42-yə çatıb.
“VietnamNews”un verdiyi məlumata görə, vəziyyət Hue şəhərində suyun səviyyəsinin yenidən qalxmasından və 400-dən çox sakinin təxliyə edilməsindən sonra daha da pisləşib. Da Nanq şəhərində də çaylar daşaraq şiddətli hava şəraitinin təsirini daha da artırıb. Vyetnam meteoroloqları bölgədə daha da şiddətli yağışlar və daşqınların baş verməsi ehtimalı barədə xəbərdarlıq ediblər.
Yerli media əvvəllər 37 ölüm hadisəsi barədə məlumat vermişdi, lakin təkrarlanan daşqınlar səbəbindən ölənlərin sayı artıb. Bu, ölkənin mərkəzi bölgələrində suyun səviyyəsinin növbə ilə gerilədiyi və yenidən qalxdığı kəskin iqlim dəyişiklikləri ilə əlaqədardır ki, bu da həyat üçün təhlükə yaradır. Sakinlərin təxliyəsi çətin şəraitdə aparılır, çünki şiddətli hava xilasetmə işlərinə mane olur. Hakimiyyət orqanları ehtiyatlılıq və təhlükəsizlik tədbirləri görməyə çağırır.
//Samir Qurbanov, Editor.az
