ABŞ prezidenti Donald Tramp və Yaponiyanın baş naziri Sanae Takaiçi bu gün nadir torpaq metallarının tədarükünün təmin edilməsi ilə bağlı çərçivə müqaviləsi imzalayıblar.
Reyting.az xəbər verir ki, hər iki ölkə Çinin bəzi əsas elektron komponentlərdəki təsirini azaltmağa çalışır.
Tərəflər dünyanın nadir torpaq ehtiyatlarının 90 faizindən çoxunu emal edən Çin haqqında heç bir açıqlama verməyiblər.
Qeyd edək ki, Çin bu yaxınlarda metallara ixrac məhdudiyyətlərini sərtləşdirib.
Yaponiya və ABŞ “kritik və nadir torpaq metalları üçün şaxələndirilmiş, likvid və ədalətli bazarların inkişafını” sürətləndirmək üçün iqtisadi siyasət vasitələrindən və əlaqələndirilmiş investisiyalardan istifadə edəcək və növbəti altı ay ərzində seçilmiş layihələrə maliyyə dəstəyi göstərməyə çalışacaqlar.
Əlavə olunur ki, iki ölkə qarşılıqlı dəstəkləyici ehtiyat müqaviləsini nəzərdən keçirəcək və təchizat zəncirinin təhlükəsizliyini təmin etmək üçün digər beynəlxalq tərəfdaşlarla əməkdaşlıq edəcək.
Xatırladaq ki, Yaponiya əvvəllər ABŞ iqtisadiyyatına daha geniş ikitərəfli ticarət müqaviləsinin bir hissəsi olaraq 550 milyard dollar investisiya qoymağı öhdəsinə götürmüşdü. Bu müqaviləyə, digər məsələlərlə yanaşı, elektrik enerjisi istehsalı və mayeləşdirilmiş təbii qaz istehsalı da daxil ola bilər.
Trampın Asiyaya səfəri ərəfəsində ABŞ və Yaponiya da daxil olmaqla, Rusiya enerji alıcılarını idxalı dayandırmağa çağırıb və Kremli Ukraynadakı müharibəyə son qoymaq üçün danışıqlara məcbur etmək məqsədilə Moskvanın iki ən böyük neft ixracatçısı olan “Rosneft” və “Lukoil” şirkətlərinə qarşı sanksiyalar tətbiq edib.
Yaponiya, sanksiyalara baxmayaraq, aşağı qiymətə və Saxalin adasından qısa logistika yoluna görə Rusiyadan qismən mayeləşdirilmiş təbii qaz almağa davam edir.
V. QULİYEV
