Beş il ərzində aparılan səylər gizli iclaslarda müzakirə olunub...
Rusiya və Çin başda olmaqla bir neçə ölkə son beş ildə BMT-nin İnsan Haqları üzrə Ali Komissarlığının (УВКПЧ) maliyyələşməsini məhdudlaşdırmaq və ya tamamilə dayandırmaq üçün cəhdlər göstərib.
Poliqon xəbər verir ki, bu barədə Reuters Agentliyi Service for Human Rights adlı qeyri-kommersiya təşkilatının hesabatına istinadla məlumat yayıb.
Hesabatda bildirilir ki, bu təşəbbüslər əsasən BMT-nin qapalı iclaslarında müzakirə edilib. Məsələn, 2021-ci ildə bəzi dövlətlər BMT İnsan Haqları Şurasının 17 layihəsinə ayrılan bütün vəsaitlərin bloklanmasını təklif ediblər. 2024-cü ildə isə həmin dövlətlər İran, Şimali Koreya (KXDR), Ukrayna, Belarus, Eritreya, Sudan və Venesuela ilə bağlı araşdırmaların maliyyələşdirilməsini tamamilə dayandırmaq təşəbbüsünü irəli sürüblər.
Bununla belə, Çin Xalq Respublikasının BMT-dəki daimi nümayəndəliyi hesabatın “əsassız və birtərəfli” olduğunu bildirib. Çin tərəfi qeyd edib ki, Pekin BMT resurslarının ədalətli bölüşdürülməsini, o cümlədən insan haqları istiqamətinin qorunmasını dəstəkləyir və bu sahəyə ayrılan vəsaitlərin əslində artdığını vurğulayıb.
Qeyd edək ki, 9 oktyabrda BMT-nin təxminən 25% sülhməramlı missiya iştirakçısını azaltmağı planlaşdırdığı barədə məlumat yayılmışdı. Ekspertlər bu qərarı təşkilatın ümumi maliyyə çətinlikləri və büdcə balanslaşdırılması səyləri ilə əlaqələndirirlər.
Poliqon.info
