EN
Topics
Society
20.10.2025 ◦ 23:15

“Yeni proqram mübarizəni daha sistemli edəcək” -

"Narkomaniyaya qarşı mübarizə üzrə yeni Dövlət Proqramı bu mübarizəni daha sistemli və səmərəli edəcək. Bu, həm də gənclərin zərərli vərdişlərdən uzaq tutulması üçün mühüm sosial addımdır”.Bunu “Hüquq və İnsan Haqları İnstitutu” publik hüquqi şəxsin İdarə Heyətinin sədri Məhəmməd Quluzadə Metbuat.az-a açıqlamasında deyib. Onun sözlərinə görə, 17 sentyabr 2025-ci ildə təsdiqlənən “Narkomaniyaya qarşı mübarizə üzrə 2025–2030-cu illər Dövlət Proqramı” bu sahədə fəaliyyətin yeni mərhələsini formalaşdırır:“Proqramın əsas məqsədi maarifləndirmə yolu ilə narkomaniyanın qarşısının alınması, narkomanlığa düçar olmuş şəxslərin müalicə və reabilitasiyası sahəsində yeni üsulların tətbiqi, həmçinin hüquqi bazanın təkmilləşdirilməsidir”.M.Quluzadə qeyd edib ki, hazırda ölkədə cinayətlərin 27.4 faizi narkotik vasitələrin və psixotrop maddələrin qanunsuz dövriyyəsi ilə bağlıdır və bu rəqəm cəmiyyət üçün ciddi xəbərdarlıq siqnalıdır:“Bu statistika göstərir ki, narkomaniya problemi təkcə hüquqi məsələ deyil, həm də sosial və təhsil yönümlü problemdir. Maarifləndirmə işləri və gənclərin sağlam həyat tərzinə təşviqi bu problemin həllində əsas istiqamətlərdən biridir”.Sədr əlavə edib ki, yeni Dövlət Proqramı bu istiqamətdə koordinasiyalı fəaliyyətin güclənməsinə, həmçinin profilaktik tədbirlərin effektivliyinin artmasına imkan verəcək.

Sevinc İbrahimzadə / Metbuat.az

Chosen
39
1
metbuat.az

2Sources