Bu gün Fins.az üçün xüsusi gündür – portalımızın yaranmasının 12 ili tamam olur. Eyni zamanda, bu gün Azərbaycanın Müstəqilliyin Bərpası Günü kimi tariximizdə əlamətdar bir gündür. Bu gün biz həm keçmişimizi xatırlayır, həm də ölkəmizin gələcəyinə baxırıq.Fins.az 2013-cü ildən fəaliyyət göstərərək Azərbaycan mediasında iqtisadi xəbərlərin etibarlı ünvanına çevrilib. İlk olaraq sığorta sektoru xəbərləri ilə fəaliyyətə başlayan portal zamanla banklar, maliyyə, qiymətli kağızlar bazarı, lizinq, sənaye, kənd təsərrüfatı, turizm, avtomobil, əmlak, nəqliyyat və İKT sahələrini əhatə edən genişmiqyaslı xəbər platformasına çevrilib.Portalın fəaliyyəti hər zaman dövlət siyasətinə dəstək və sahibkarların uğurlarının ictimaiyyətlə paylaşılması prinsipinə əsaslanıb. Biz inanırıq ki, obyektiv və operativ informasiya iqtisadiyyatın inkişafına real dəstək verir.
Müstəqillikdən bu günə qədər – Qürur və Uğurlar1991-ci il oktyabrın 18-də qəbul edilmiş Dövlət Müstəqilliyi haqqında Konstitusiya Aktı Azərbaycan tarixində dönüş nöqtəsi oldu. Müstəqillikdən sonra ölkəmiz dayanıqlı iqtisadi siyasət və sahibkarlığa dəstək yolu ilə sürətli inkişaf yolu keçdi.2020-ci ilin 44 günlük Vətən Müharibəsi (II Qarabağ müharibəsi) isə Azərbaycan üçün həm hərbi, həm də iqtisadi baxımdan dönüş nöqtəsi oldu. Bu qələbə ilə Müzəffər Ali Baş Komandan, Azərbaycan Respublikasının Prezidenti İlham Əliyev Azərbaycanın yeni tarixinə qızıl hərflərlə yazılacaq sətirlərin müəllifi oldu və öz adını da tarixə əbədi yazdı.
Qarabağ və Şərqi Zəngəzur – yenidənqurma və inkişafın simvoluMüharibədən sonra Qarabağ və Şərqi Zəngəzur iqtisadi rayonlarının yenidən qurulması Azərbaycan dövlətinin prioritet məsələlərindən biri oldu. Son 5 il ərzində bu bölgələrdə infrastruktur layihələri, sənaye zonaları, kənd təsərrüfatı müəssisələri, sosial obyektlər və yollar inşa edildi. Bu işlər regional iqtisadiyyatın canlanmasına, iş yerlərinin artmasına və insanların rifahının yüksəlməsinə imkan yaratdı.Azərbaycan Respublikasının Prezidenti və Silahlı Qüvvələrin Müzəffər Ali Baş Komandanı İlham Əliyev və birinci xanım Mehriban Əliyeva bu bölgələrə dəfələrlə səfər etmiş, görülən işləri yerində qiymətləndirmiş və əlavə layihələrin həyata keçirilməsi ilə bağlı göstərişlər vermişlər. Hər səfər regionların sürətli inkişafına və dövlət siyasətinin uğurlu icrasına təkan verir.
Prezident İlham Əliyevin sözləri bu uğurun təsdiqidir:“Mən hesab edirəm ki, ölkəmizin gələcəyi çox parlaq olacaq. Biz son illər ərzində çox böyük uğurlara imza atmışıq. Ölkəmizin həm siyasi, həm iqtisadi sahələrdə uğurları bu gün beynəlxalq təşkilatlar tərəfindən də qəbul edilir. Beynəlxalq arenada böyük uğurlar əldə edilib. Azərbaycan bu gün çox güclü bir ölkəyə çevrilib. Ölkə daxilindəki bütün məsələlər öz həllini tapır. Əlbəttə ki, Dağlıq Qarabağ münaqişəsinin həlli ölkəmizə yeni nəfəs verəcək. İnsanlar, ilk növbədə, öz dədə-baba torpaqlarına qayıdacaqlar, öz yaxınlarının qəbirlərini ziyarət edə biləcəklər. Azərbaycan dövləti mütləq bu işlərdə onlara maksimum kömək göstərəcək. Biz işğaldan azad edilmiş torpaqları yenidən quracağıq, evlər, inzibati binalar, məktəblər tikiləcək. Beləliklə, ölkəmiz üçün yeni bir dövr başlanacaq. Bu yeni dövr böyük imkanlar açacaq, təkcə iqtisadi sahədə yox, eyni zamanda, siyasi münasibətlər sahəsində hesab edirəm ki, müsbət meyillər daha da güclənəcək. Azərbaycan beynəlxalq arenada öz rolunu daha da artıracaq. Azərbaycana olan hörmət daha da artacaq ki, biz güclü dövlət kimi öz ərazi bütövlüyümüzü, ədaləti və beynəlxalq hüququ bərpa edirik. Beləliklə, ölkəmizin gələcək inkişafı əminəm ki, çox uğurlu olacaq. Biz bu günə qədər qarşımızda duran bütün vəzifələrə uğurla çatmışıq. Bəyan etdiyim bütün hədəflərə çatmışıq. Ərazi bütövlüyümüzün bərpası, torpaqlarımızın qaytarılması mənim Prezident kimi başlıca vəzifəm idi. Mən şadam ki, bu vəzifənin öhdəsindən də şərəflə gəlirəm və Azərbaycan xalqının dəstəyi, zəhməti və cəsarəti hesabına biz torpaqlarımızı qaytarırıq. Azərbaycan xalqının fədakarlığı bir daha onu göstərir ki, biz böyük xalqıq, biz birlik nümayiş etdirmişik və bu birlik bizi daha da gücləndirəcək, ölkəmizi daha da qüdrətli ölkəyə çevirəcəkdir.”
Fins.az-ın rolu – dövlət siyasətinə dəstəkFins.az olaraq, portalın fəaliyyəti Azərbaycan iqtisadiyyatının inkişafını izləmək və obyektiv şəkildə ictimaiyyətə çatdırmaq üzərinə qurulub. Biz yalnız xəbər yaymırıq, sahibkarların və maliyyə qurumlarının fəaliyyətini, dövlət iqtisadi siyasətinin uğurlarını oxuculara çatdırırıq.12 il ərzində portal dövlət qurumları, banklar və iri şirkətlərlə əməkdaşlıq edərək Azərbaycan iqtisadiyyatının uğurlarını geniş auditoriyaya çatdırmışdır. Biz inanırıq ki, obyektiv və dəqiq informasiya iqtisadi inkişafın mühüm dəstəyinə çevrilir.
Gələcəyə baxış və davamlı dəstəkƏziz oxucular, qarşıdakı illərdə də Fins.az Azərbaycan dövlətinin iqtisadi siyasətinə dəstək missiyasını davam etdirəcək. Qarabağ və Şərqi Zəngəzurda həyata keçirilən yenidənqurma işlərini diqqətlə izləyərək, oxuculara obyektiv, analitik və operativ məlumatlar təqdim edəcəyik.Birlikdə Azərbaycan iqtisadiyyatının uğurlu yolunu izləməyə, gələcək nəsillərə obyektiv və doğru informasiya mirası buraxmağa davam edəcəyik.
Fins.az-dan səmimi təbrikFins.az kollektivi olaraq, Azərbaycan Respublikasının Müstəqilliyinin Bərpası Günü münasibətilə bütün xalqımızı səmimi qəlbdən təbrik edirik. Dövlətimizin ali prinsiplərinə sadiq qalaraq, iqtisadi inkişafımızı əks etdirən xəbərlərin dəqiq, obyektiv və operativ şəkildə cəmiyyətə çatdırılması istiqamətində fəaliyyətimizi bundan sonra da ən yüksək səviyyədə davam etdirəcəyik.
Fuad MədətovBaş redaktor, Fins.az
