Nepalda 2 yaşlı qız yeni canlı ilahə seçildi
Ajans.az xəbər verir ki,ailə üzvləri onu çərşənbə axşamı ölkənin ən böyük hindu bayramı olan Daşain günlərində rəsmi mərasimlə məbəd sarayına aparıblar. Kumari — "bakirə tanrıça" statusunu daşıyan gənc qız — Nepalın Newar icmasının Şakya klanından seçilir və həm hindular, həm də buddistlər tərəfindən müqəddəs hesab olunur. Canlı ilahə seçiləcək qızlar adətən 2-4 yaş aralığında olur. Onların dəri, saç, göz və dişlərinin qüsursuz olması, həmçinin qaranlıqdan qorxmaması tələb olunur. Aryatara Şakya bu şərtlərə tam cavab verdiyi üçün seçilən namizədlər arasında önə çıxıb. Qız yetkinlik yaşına çatana qədər bu müqəddəs statusu daşıyır və yalnız o zaman yerinə yeni Kumari təyin olunur. "Dünən qızım idi, bu gün tanrıçadır" Yeni Kumari'nin atası Ananta Şakya bildirib ki, qızının ilahə olacağına dair əlamətləri artıq doğulmazdan əvvəl hiss ediblər: “Həyat yoldaşım hamiləlik dövründə onun tanrıça olduğunu xəyal etmişdi. Biz bilirdik ki, o, xüsusi biridir. Dünən mənim qızım idi, bu gün isə ilahədir”, – deyə o qeyd edib. Çərşənbə axşamı Daşain festivalının səkkizinci günü qeyd olunarkən, Aryatara yüzlərlə fədainin qarşısında Katmandu küçələrindən keçərək məbəd sarayına aparılıb. İnsanlar ən yüksək hörmət əlaməti olaraq alınlarını onun ayaqlarına toxundurublar, çiçəklər və pul hədiyyə ediblər. Yeni Kumari cümə axşamı prezident də daxil olmaqla fədailərə xeyir-dua verəcək. Yeni ilahə Aryatara, 2017-ci ildə təyin olunmuş və artıq 11 yaşına çatmış Trishna Şakyanı əvəz edib. Keçmiş Kumari çərşənbə axşamı məbədi rəmzi şəkildə tərk edib, onun palanquinlə (taxta kürsü) daşınması mərasimi keçirilib. Canlı ilahələr təmtəraqlı status qazansalar da, onların təcrid olunmuş həyatları və sonrakı uyğunlaşma çətinlikləri ilə bağlı tənqidlər də mövcuddur. Kumarilər yalnız seçilmiş oyun yoldaşları ilə vaxt keçirir, il ərzində cəmi bir neçə dəfə çölə çıxmalarına icazə verilir. Əfsanəyə görə, keçmiş Kumari ilə evlənən kişi erkən ölür, bu səbəbdən bir çoxu subay qalır. Lakin son illərdə ənənəyə bəzi dəyişikliklər edilib: artıq Kumarilər özəl müəllimlər vasitəsilə təhsil alır, televizora baxmaq hüququna malikdir. Hökumət təqaüdə çıxmış Kumarilərə təxminən 110 dollar məbləğində aylıq pensiya da təklif edir.
