Onun sözlərinə görə, iki il əvvəl təsdiqlənən kooperasiya istehsalını həyata keçirən müəssisələr üçün kredit subsidiyaları artıq əməkdaşlığa dəstək göstərir. Nümunə olaraq, Qazaxıstanda Rusiya və Belarus şirkətləri ilə birlikdə həyata keçirilən kombayn kabinələrinin istehsalı layihəsini göstərib. Bektenov vurğulayıb ki, bununla yanaşı, sənaye məlumatlarının mübadiləsini və yüklərin daşınmasını asanlaşdıracaq ortaq rəqəmsal platformalara da ehtiyac var.
"Bu təşəbbüslərə yeni impuls vermək üçün ölkələrimizin rəqəmsal xidmətlərinin inteqrasiyası üzrə birgə səylər göstərilməlidir", - deyə Qazaxıstan Baş naziri qeyd edib.
Belarusun Baş naziri Aleksandr Turçin isə bildirib ki, Aİİ postsovet məkanında ən uğurlu inteqrasiya nümunəsi hesab oluna bilər. Onun sözlərinə görə, coğrafi əhatə fərqli olsa da, ölkələrin qarşılaşdığı iqtisadi problemlər oxşardır və onların həlli üçün birgə addımlar vacibdir.
