.jpg)
BAKI, 29 sentyabr. TELEQRAF
2021–2024-cü illər arasında Azərbaycanın qeyri-neft sektoru orta hesabla illik 6,7% artıb və hazırda milli iqtisadiyyatın 68%-ni təşkil edir. Qeyri-neft ixracı son illərdə iki dəfə artaraq ölkənin rəqabət qabiliyyətinin yüksəldiyini nümayiş etdirib.
Teleqraf xəbər verir ki, bu barədə iqtisadiyyat nazirinin müavini Səməd Bəşirli Bakı İqlim Fəaliyyəti Həftəsində (BCAW 2025) deyib.
O bildirib ki, hazırda ÜDM-in 80%-dən çoxu özəl sektorun payına düşür:
“Eyni zamanda, dövlət maliyyə göstəriciləri də möhkəmlənib: 2025-ci ildə dövlət büdcəsinin gəlirləri 2017-ci illə müqayisədə iki dəfədən çox artıb, strateji valyuta ehtiyatları isə təxminən iki dəfə yüksəlib. Dövlət borcu isə ÜDM-in 6,5%-nə enərək dünyanın ən aşağı göstəricilərindən birinə çevrilib.
Azərbaycanın coğrafi mövqeyi onun strateji regional güc rolunu daha da möhkəmləndirir. Orta Dəhliz üzrə tranzit həcmləri genişlənməkdə davam edir, yaxın vaxtlarda istifadəyə veriləcək “Denizli Dəhlizi” isə bu mövqeyi daha da gücləndirəcək.
Enerji siyasəti Azərbaycanın inkişafında və beynəlxalq nüfuzunda əsas istiqamətlərdən biri olaraq qalır. Azərbaycan həm ənənəvi enerji resurslarında, həm də bərpaolunan enerji sahəsində etibarlı tərəfdaş kimi çıxış edir. Genişmiqyaslı günəş və külək layihələri, Qarabağ və Şərqi Zəngəzurda yaradılan “yaşıl enerji zonaları” ölkəmizi qlobal enerji keçidinin fəal iştirakçısına çevirir”.
