Musavat.com xəbər verir ki, ABŞ prezidenti Donald Tramp son günlər Ukrayna cəbhəsindəki vəziyyət və Kiyevin hazırladığı yeni əks-hücum planı barədə gizli brifinqlər alıb. The Wall Street Journal nəşri yazır ki, məhz bu məlumatlandırmalardan sonra Trampın Ukrayna müharibəsinə dair ritorikasında müəyyən yumşalma hiss olunur.
Nəşrin məlumatına görə, Tramp son günlər Vaşinqtonda yüksək səviyyəli şəxslərlə – Ukrayna məsələləri üzrə xüsusi nümayəndə Kit Kellogq və ABŞ-ın BMT-dəki yeni səfiri Mayk Uolts ilə qapalı görüşlər keçirib. Onlar prezidentə cəbhədəki real vəziyyət, Rusiya Ordusunun son aylarda ciddi irəliləyiş əldə edə bilməməsi və müharibənin ümumi gedişatı barədə geniş məlumat veriblər.
Rəsmilər Trampa həmçinin Ukraynanın yaxın günlərdə planlaşdırdığı yeni əks-hücum əməliyyatı barədə də ətraflı məlumat təqdim ediblər. Bildirilib ki, bu əməliyyat ABŞ-ın kəşfiyyat dəstəyi və texniki yardımı olmadan uğurlu ola bilməz. Vaşinqton Kiyevin əməliyyatına logistika, silah və məlumat təminatı baxımından əsas dəstək verəcək.
Mənbələr vurğulayır ki, Trampın tonundakı dəyişiklik onun siyasətində köklü dəyişikliyə səbəb olmayıb. O, hələ də Ukraynaya silah satışına icazə verir, lakin ABŞ silahlarının Rusiya ərazisinə hücumlarda istifadəsinə qadağanı qüvvədə saxlayır. Trampın administrasiyası bunun münaqişənin genişlənməsinin qarşısını almaq üçün vacib olduğunu hesab edir.
Beləliklə, Trampın Ukrayna məsələsinə münasibətində ritorikanın yumşalmasına baxmayaraq, ümumi siyasi kurs dəyişməz qalır. Ekspertlər hesab edirlər ki, bu, Tramp administrasiyasının Rusiyaya təzyiq siyasətini saxlayaraq eyni zamanda münaqişənin nəzarətdən çıxmasının qarşısını almağa çalışdığını göstərir.
Musavat.com
