Əminliklə deyə bilərik ki, bu gün Prezident İlham Əliyevin liderliyi altında dünyada öz nüfuzu ilə seçilən bütöv, suveren, güclü və qüdrətli yeni bir Azərbaycan dövləti yaradılır.
Bunu Ölkə.az-a açıqlamasında Milli Məclisin deputatı Cavanşir Feyziyev Prezident İlham Əliyevin ABŞ səfərini və Nyu-Yorkda keçirdiyi görüşləri şərh edərkən deyib.
Onun sözlərinə görə, Prezident İlham Əliyevin ölkəmizə rəhbərlik etdiyi dövr ümumiyyətlə Azərbaycanın beynəlxalq aləmdə sürətli inkişaf mərəhləsinə qədəm qoyaraq hədflərinə nail olan güclü, qüdrətli və çox böyük nüfuza sahib ölkə kimi xarakterizə olunur. “Məhz Prezidentin liderliyi altında Azərbaycan qarşısında duran beynəlxalq aləmdə həlli qeyri-mümkün hesab olunan Ermənistan-Azərbaycan münaqişəsini həll etməklə müasir dünyada yeni reallıqlar yaradan ölkə rolunda çıxış etməkdədir. Azərbaycanın yaratdığı yeni reallıqlar beynəlxalq aləm tərəfindən dəstəklənərək təqdir olunmaqdadır. Prezident İlham Əliyevin BMT Baş Assambleyasının 80-ci sessiyasında iştirakı, keçirdiyi görüşlər və orada gedən müzakirələr dediyimizin bariz nümunəsidir”, - o qeyd edib.
Deputat əlavə edib ki, Prezident İlham Əliyevin BMT Baş Assambleyasının 80-cı sessiyasında iştirakı böyük siyasi tarixi əhəmiyyət kəsb edir və bunu şərtləndirən amillər var: “Birincisi, Azərbaycan indiyədək BMT Təhlükəsizlik Şurasının Ermənistan-Azərbaycan münaqişəsinin həlli ilə bağlı qəbul etdiyi və 30 ilə yaxın həyata keçirilməyən qətnamələrin icrası ilə qərarı məsuliyyəti öz üzərinə götürərək təkbaşına həll edən yeganə dövlətdir. İkincisi, Azərbaycan öz ərazi bütövlüyünü təmin etmək istiqamətində BMT TŞ-nin qətnamələri icra edərkən hərbi əməliyyatlar zamanı müharibə qaydaları ilə bağlı heç bir beynəlxalq qaydaları pozmayıb. Ən yüksək səviyyədə peşəkarcasına həyata keçirdiyi hərbi əməliyyatlar zamanı mülki obyektlər və insanlar bundan əziyyət çəkməyib.
Üçüncüsü, öz ərazi bütöylüyünü və tam suverenliyini bərpa edən Azərbaycan Cənubi Qafqazda sülhün memarı və təminatçısı rolunda çıxış edərək Avropa ilə Asiyanın strateji coğrafiyasında yerləşən bölgəni yeni bir əməkdaşlıq qovşağına çevrimək niyyətidir.
Dördüncüsü, Azərbaycanın yeni dünya nizamının formalaşmasında qlobal sülhə və təhlükəsizlik arxitekturasına öz töhfəsini vermək istiqamətində yürütdüyü siyasətdir.
Beşincisi, Prezident İlham Əliyevin yürütdüyü uğrulu çoxvektorlu diplomatiya nəticəsində nəinki Azərbaycanı, bütövlükdə Cənubi Qafqazı Avrasiya coğrafiyasında bir-birinə əks olan qüvvələr arasında qarşılıqlı maraqlara əsaslanan yeni əməkdaşlıq formatlarının yaradılması istiqamətindəki fəaliyyətidir.
Ümumiyyətlə, cənab Prezidentin BMT Baş Assambleyasınının sessiyasında iştirakını Azərbaycanın beynəlxalq aləmə tamamilə yeni formatda təqdimatı kimi də dəyərləndirə bilərik. Prezidentin sıx görüş qrafiki və beynəlxalq maliyyə institutlarının rəhbərləri, bir sıra ölkə liderləri ilə keçirdiyi və keçirəcəyi görüşlər bunun göstəricisidir. Prezident İlham Əliyevin Blackstone, Nouberger Berman, Brookfield Asset Management kimi şirkətlərinin rəhbər şəxsləri ilə danışıqları Azərbaycanın qlobal maliyyə sisteminə inteqrasiyasının yeni səviyyəsinin inkişafında mühüm mərhələ və yaratdığı reallıqların qəbulu kimi qiymətləndirilməlidir. Bu görüşlər Azərbaycanın qlobal maliyyə xəritəsində strateji əhəmiyyətinin göstəricisi kimi qəbul olunmalıdır. Belə bir təşəbbüsün ev sahibi tərəfindən edildiyini nəzərə alaraq, beynəlxalq investisiya ictimaiyyətinin ölkəmizə artan marağını nümayiş etdirir. Bu isə onu deməyə əsas verir ki, Azərbaycan qlobal maliyyə institutları tərəfindən sabit və perspektivli tərəfdaş kimi qəbul edilir.
Dünyanın aparıcı maliyyə qurumları Azərbaycana təkcə bazar kimi deyil, həm də Avropa və Asiyanı birləşdirən, inkişaf etmiş enerji və nəqliyyat infrastrukturuna malik olan və davamlı inkişaf nümayiş etdirən strateji məkan kimi qəbul edirlər. Azərbaycan üçün bu, iqtisadiyyatını şaxələndirmək, qeyri-neft sektorunu genişləndirmək, yeni texnologiyalar və idarəetmə təcrübələrini cəlb etmək üçün bir fürsətdir. Kapital uğrunda qlobal rəqabət şəraitində Azərbaycanı beynəlxalq investisiyalar üçün cəlbedici mərkəzə çevirən məhz sabitlik və aydın inkişaf perspektivləri təklif etmək bacarığıdır. Bütün bunlar Azərbaycanın yaratdığı yeni reallıqlara uyğun qarşısında duran çağırışlara, hədəflərə nail olunmasına geniş imkanlar açacaq”.
Mürtəza
