Qızıl tarixən sərvət, maliyyə təhlükəsizliyi və sənaye sahələrində dəyərli mineral kimi tanınıb.
Turkustan.az xəbər verir ki, əsrlər boyu zərgərlik, valyuta və texnologiyada geniş istifadə olunub. NASA-nın son araşdırması isə bu qiymətli metalın Yer üzündəki ən böyük ehtiyatının okeanlarda olduğunu ortaya qoyub. Lakin bu ehtiyatdan istifadə demək olar ki, mümkün deyil.
Ənənəvi qızıl yataqlarından fərqli olaraq, okeanlardakı qızıl bərk damarlarda deyil, olduqca kiçik miqdarda həll olunmuş formada mövcuddur. Bu isə onun hasilatını həm texniki, həm də iqtisadi baxımdan ciddi problemə çevirir.
NASA-nın məlumatına əsasən, okean sularında ümumilikdə təxminən 20 milyon ton qızıl mövcuddur. Lakin hər litr suda bu metalın cəmi 0,00000005 qram səviyyəsində olduğu bildirilir. Bu qədər aşağı konsentrasiya isə mövcud texnologiyalarla çıxarılmanı qeyri-mümkün edir.
Quru mədənlərində qızıl müəyyən damarlarda toplanır və hasilatı daha realdır. Okeanlarda isə qızıl bərabər şəkildə yayılıb və bu, ənənəvi çıxarma üsullarını qeyri-effektiv edir. Buna baxmayaraq, okeanlar Yer kürəsinin ən böyük qızıl mənbəyi hesab olunur.
Aytən Yaşar/ Turkustan.az
