Bazar günü Formula-2 mövsümünün 12-ci mərhələsinin əsas yarışı baş tutdu. Qələbəni “DAMS” komandasının amerikalı sürücüsü Cek Krouford qazandı.
Mövsümün lideri, “Invicta” pilotu Leonardo Fornaroli isə startdakı ilk döngədə gərgin mübarizə zamanı “Rodin” komandasının irlandiyalı sürücüsü Aleks Danna toxundu. Nəticədə Dann trasdan kənara çıxdı, Fornaroli isə insidentə görə 10 saniyəlik cərimə aldı. Bu cərimə onun xal qazanmaq imkanlarına təsir göstərdi və mövsümün ümumi sıralamasında gərginliyi daha da artırdı.
Formula 2, Formula 1-in bir pillə aşağı seriyası hesab olunur və gənc pilotların əsasən F1-ə yüksəlməsi üçün “sınaq meydanı” rolunu oynayır. Bu seriyada bütün komandalar eyni tip bolidlərdən istifadə edir: Dallara şassisi, Mecachrome mühərriki və Pirelli təkərləri. Bu, sürücülərin bacarığının daha aydın üzə çıxmasına şərait yaradır.
Yarış həftəsonları adətən iki mərhələdən ibarət olur: sprint yarışı və əsas (feature) yarış. Əsas yarışda daha çox xal verilir. Qaliblər həm sürücülər, həm də komandalar çempionatında xal toplayır.
Son illərdə Çarlz Lekler, Corc Rassell, Oskar Piastri kimi F1-də uğur qazanan pilotlar məhz Formula 2-dən keçiblər.
2025 mövsümündə də mübarizə çox gərgindir. Kroufordun Azərbaycan qələbəsi xal durumuna böyük təsir göstərərək, Fornarolinin liderliyini təhlükə altına alır. Bu isə mövsümün qalan mərhələlərində daha maraqlı mübarizəyə zəmin yaradır.
Səbuhi MƏMMƏDOV
XQ
