Modern.az saytından verilən məlumata görə, ain.az xəbər verir.
Azərbaycanda elektrik və hibrid avtomobillərinin ölkəyə idxalına tətbiq olunan güzəştlərin müddəti başa çatmaq üzrədir. Müddət 2026-cı ilin yanvarın 1-dək nəzərdə tutulub. Həmin müddətin uzadılıb-uzadılmayacağına dair dəqiq məlumat isə hələlik yoxdur.
Modern.az-a açıqlamasında Azərbaycan Avtomobil Dilerləri Assosiasiyası İdarə heyətinin sədri Eyyub Əliyev qeyd edib ki, hibrid avtomobillərin dövrü tədricən başa çatsa da, elektrikli avtomobillərin inkişafının davam edəcəyi gözlənilir.
“Azərbaycanda 2030-cu ilə qədər Sosial-İqtisadi İnkişafa dair Milli Prioritetlərin 5-ci maddəsi - “Təmiz ətraf mühit və yaşıl artım ölkəsi” adlanır. Bu istiqamətdə artıq ciddi addımlar atılıb. Elektrikli avtomobillər üçün yeni infrastruktur qurulub: istər “Azərişıq” ASC, istərsə də 10-dan çox özəl şirkət tərəfindən elektrik doldurma məntəqələri istifadəyə verilib”.
O həmçinin bildirib ki, belə bir şəraitdə, şəxsi proqnozuna əsaslanaraq deyə bilər ki, elektrikli avtomobillərin dövrünün sona çatacağına inanmır:
“Əksinə, bu istiqamətdə inkişaf davam edəcək. Hibrid avtomobillərin bazardan çəkilməsi isə qısamüddətli dövrdə daxili yanma mühərrikli yeni avtomobillərə olan marağı bir qədər artıra bilər”.
Həmsöhbətimiz onu da əlavə edib ki, ikinci əl bazarında da müəyyən canlanma müşahidə oluna bilər:
“Bununla yanaşı, avtomobil parkının yenilənməsi istiqamətində aparılan işlər davam etdirilir. Köhnə avtomobillərin utilizasiyası, vətəndaşların artıq köhnə nəqliyyat vasitələrindən imtina etməsi bu prosesi sürətləndirir”.
E.Əliyev bu cür təşəbbüslərin daha da genişlənəcəyinə ümidləndiyini də vurğulayıb:
Mən ümid edirəm ki, qərardan asılı olmayaraq avtomobil parkının yenilınməsi istiqamətində gedən işlər dayanmayacaq. Bunu əminliklə deyə bilərəm ki, istənilən halda avtomobil parkımızın yenilənməsi istiqamətində addımlar atılır. İstər elektrikli, istər hibrid, istərsə də daxili yanma mühərrikli avtomobillər olsun – əsas odur ki, ölkəmizin avtomobil parkı müasir tələblərə cavab verəcək şəkildə yenilənməkdə davam edir”,- deyə o bildirib.
Sonrakı hadisələr barədə daha çox məlumat almaq üçün ain.az saytını izləyin.
