"AzərEnerji" ASC 2023-cü ilin 19-20 sentyabr tarixlərində həyata keçirilən antiterror tədbirlərindən dərhal sonra azad olunmuş ərazilərdə genişmiqyaslı işlər görülüb.
Bu barədə Publika.az-a səhmdar cəmiyyətindən məlumat verilib.
Bildirilib ki, ilkin olaraq antiterror əməliyyatından cəmi 4 gün sonra Xankəndi və ətraf ərazilər Ermənistanın enerji sistemindən ayrılaraq 110 kV "Şuşa" yarımstansiyası vasitəsilə ölkə enerji sisteminə qoşulub və beləliklə, 30 illik işğaldan sonra azad edilmiş regionda Azərbaycan işığı yanıb.
Məlumata əsasən, işğal müddətində baxımsız saxlanılmış 50 MVt gücündə "Sərsəng" Su Elektrik Stansiyasında təcili təmir-bərpa işləri aparılaraq 2023-cü ilin oktyabr ayının əvvəlində stansiya işə salınıb: "Həmçinin, Ağdərə rayonunda 10 MVt gücündə "Həsənriz", 3 MVt gücündə "Torağay-1", 5,9 MVt gücündə "Torağay-2", 5 MVt gücündə "Torağay-3", 0,8 MVt gücündə"Torağay-4" kiçik su elektrik stansiyaları təmir-bərpa edilərək işə qoşulub".
