Hindistanın turistik Goa əyalətində bir YouTuber yeni açılan beynəlxalq hava limanı haqqında kabuslu olduğu yönündə video paylaşdığı üçün polis tərəfindən saxlanılıb.
570 mindən çox abunəçisi olan və qorxu hekayələri ilə paranormal hadisələrə fokuslanan kanalın sahibi Akşay Vaşişt çərşənbə günü Delhidə tutularaq Mopa hava limanı polis bölməsinə aparılıb.
Polisin məlumatına görə, “Evil Haunted Goa Airport” başlığı ilə yayımlanan videoda Manohar beynəlxalq hava limanının krematoriya sahəsi üzərində qurulduğu iddia edilib.
Vaşişt videoda hava limanı işçilərinin paranormal fəaliyyətlər müşahidə etdiyini, bəzi pilotların isə uçuş zolağında qırmızı sari geyinmiş sirli bir qadın gördüklərini və bu səbəbdən gecə uçuşlarını rədd etdiklərini bildirib.
Rəsmi orqanlar videodakı iddiaları əsassız, pis niyyətli və batil inanclara əsaslanan kimi qiymətləndirib. Polis həmçinin Vaşiştin izləyicilərindən gələn uydurma şahidlikləri istifadə edərək iddialarına inandırıcılıq qazandırmağa çalışdığını açıqlayıb.
Mopa-dan Delhiyə göndərilən polis qrupu Vaşiştin telefonunu, kompüterini və kamerasını müsadirə edib. Onun barəsində Hindistan Cinayət Məcəlləsinin “ictimaiyyətə zərər vurmaq” və “cinayət törətmək üçün birgə niyyət” maddələri üzrə iş başlanılıb. Polis videonu Facebook-da paylaşan səhifə administratoru haqqında da hüquqi addımların nəzərdən keçirildiyini bildirib.
Əvvəlki sosial media böhranları
Xatırladaq ki, bu hadisə Goa rəhbərliyinin sosial media məzmunları ilə yaşadığı ilk böhran deyil. Daha əvvəl bəzi influencerlər əyalətin sahillərində və istirahət məkanlarında qiymət artımları səbəbindən turist sayının azaldığını iddia etmişdilər.
Goa Turizm Naziri Rohan Khaunte isə iyulda bu iddiaları rədd edərək, pul ilə yönləndirilmiş saxta influencerların əyalətin imicini zədələməyə çalışdığını bildirmişdi.
