Kanadanın Monreal Planetariumundan astrofizik Öryan Eqalın rəhbərliyi ilə alimlər 2023 CX1 adlı kiçik asteroidin ötən ilin fevral ayında Fransanın üzərində atmosferə daxil olub düşməsini araşdırıblar. Nəticələr göstərib ki, müəyyən tip asteroidlər 30 kilometr dərinliyə qədər bütövlüyünü qoruyub saxlaya bilir, daha sonra isə demək olar ki, ani şəkildə parçalanaraq enerjisini partlayış formasında buraxır.
Publika.az xəbər verir ki, tədqiqat Nature Astronomy jurnalında dərc olunub.
SETI İnstitutunun və NASA-nın Eymes Tədqiqat Mərkəzinin astronomu Piter Yenniskens xatırlayır:
“Asteroid atmosferə daxil olmamış cəmi yeddi saat əvvəl aşkar edilmişdi. Mən dərhal Hollandiyada yaşayan qardaşıma zəng etdim və o, alovlu kürəni öz gözləri ilə görə bildi”.
Göy cisminin ölçüsü təxminən 72 santimetr, çəkisi isə 650 kiloqram olub. Kiçik ölçülərinə baxmayaraq, asteroid son mərhələdə ikiqat işıq saçan parlaq bolid yaradıb. Analiz asteroidin geniş yayılmış L-xondritlər - az dəmirli adi xondritlər tipinə aid olduğunu göstərib.
"FRIPON/Vigie-Ciel" şəbəkəsindən olan alimlər və könüllülərin iştirakı ilə ekspedisiya düşmədən cəmi bir neçə saat sonra Normandiyada ilk qalıqları tapmağa nail olub. Tapılan fraqmentlərdən biri cəmi 3 qram çəkidə olub — onu otların arasında, yalnız mamır üzərindəki vəziyyəti sayəsində fərqləndirmək mümkün olub.
