ain.az, Ayna portalına istinadən məlumat verir.
Vəsait 170 milyard avroya qədər olan “reparasiya kreditləri” üçün istifadə oluna bilər
Avropa İttifaqı (Aİ) Rusiyanın dondurulmuş aktivlərindən istifadə etməklə Ukraynanın maliyyələşdirilməsi üçün yeni mexanizmlər hazırlayır. AYNA.AZ xəbər verir ki, bu barədə Britaniyanın "The Financial Times" (FT) qəzeti mənbələrinə istinadən məlumat yayıb.
Avropa Komissiyasının (AK) planlarına görə, vəsait 170 milyard avroya qədər olan “reparasiya kreditləri” üçün istifadə oluna bilər.
Belçikadakı “Euroclear” depozitarında dondurulmuş Rusiya aktivlərinin əksəriyyəti artıq nağd pul qalıqlarına köçürülüb. Bu vəsaitlərin Aİ-nin sıfır faizli istiqrazlarının alınmasına yönəldilməsi, nəticədə kapitalın tranşlarla Ukraynaya köçürülməsi gözlənilir.
Aİ-dən kənar ölkələrin layihədə iştirakına imkan verəcək xüsusi fondun yaradılması da nəzərdən keçirilir.
AK sədri Ursula von der Leyen keçən həftə bəyan edib ki, bu sxem Kiyevə dəstəyin dərhal başlamasına imkan verəcək. Kreditlər yalnız Rusiya müharibəyə dəymiş ziyana görə təzminat ödəməyə razı olarsa, ödəniləcək. "Risk kollektiv şəkildə paylaşılmalı olacaq" deyə o, Belçikanın Moskvanın potensial hüquqi hərəkətləri ilə bağlı narahatlığına işarə edərək vurğulayıb.
Vaşinqton müttəfiqlərinin təkcə Rusiya aktivlərindən əldə edilən mənfəətdən deyil, həm də əsas kapitalın özündən istifadə etməsində israr edir. G7 ölkələrinə göndərdiyi notada ABŞ “Ukraynanın müdafiəsini maliyyələşdirmək üçün dondurulmuş Rusiya vəsaitlərinin innovativ istifadəsini nəzərdən keçirməyi” təklif edib.
Məsələ bu həftə Aİ maliyyə nazirlərinin Danimarkada keçiriləcək görüşündə müzakirə olunacaq. Bununla belə, bir sıra ölkələr - ilk növbədə Belçika, Almaniya və Fransa kapitaldan birbaşa istifadənin ehtiyat valyuta kimi avroya inamı sarsıda biləcəyindən ehtiyat edirlər.
Brüssel və Paris hesab edirlər ki, əsas kapitala müdaxilə mövcud qanunvericilik çərçivəsindən kənara çıxa bilər. Bununla belə, Almaniya bu cür addımların avro ilə ifadə olunan ehtiyatlara sahib olan investorlar üçün risk yarada biləcəyindən narahatlığını ifadə edir.
Ən son xəbərləri və yenilikləri almaq üçün ain.az saytını izləyin.
