Slovakiyanın İqtisadiyyat naziri Denisa Sakova ABŞ prezidenti Donald Trampın Avropa ölkələrinə Rusiyadan neft və təbii qaz alışını dayandırmaq çağırışına “əlverişli şərtlər” yerinə yetirilənə qədər əməl etməyəcəklərinə işarə edib.
Slovakiya mətbuatının məlumatına görə, Sakova paytaxt Bratislavada jurnalistlərə Trampın Avropa ölkələrinin Rusiyadan neft və təbii qaz almasını dayandırması çağırışları ilə bağlı danışıb.
Sakova Beynəlxalq Atom Enerjisi Agentliyinin (MAQATE) 69-cu Baş Konfransında ABŞ-ın energetika naziri Kris Rayt ilə görüşdüyünü və Trampın mövzu ilə bağlı çağırışlarını müzakirə etdiklərini bildirib.
Nazir Sakova, "Tam öhdəlik götürməzdən əvvəl müvafiq şərtlər yerinə yetirilməlidir. Əks halda sənayemizə və iqtisadiyyatımıza ciddi ziyan vurmaq riski ilə üzləşirik" dedi.
Sakova, ilk növbədə alternativ marşrutları dəstəkləmək üçün kifayət qədər infrastrukturun yaradılmasının vacibliyini vurğulayaraq, Slovakiyanın Qərbdən gələn alternativ tədarük yollarının “ən kənarında” yerləşdiyini və buna görə də Rusiya qazının tamamilə kəsilməsinin risk yaratdığını qeyd edib.
ABŞ prezidenti Tramp sentyabrın 15-də verdiyi açıqlamada Avropa ölkələrini "Rusiyadan neft almamağa" çağıraraq, "Onların (Rusiyaya qarşı) tətbiq etdiyi sanksiyalar kifayət qədər sərt deyil. Mən sanksiyalar tətbiq etməyə hazıram, lakin onlar da mənim etdiklərimə mütənasib olaraq sanksiyaları sərtləşdirməli olacaqlar" deyib.
