Keçən günlərdə Bakı Dövlət Universitetində bəzi fənlərin həftədə 4 gün tədris olunacağı açıqlanıb. Bu qərara jurnalistika ixtisası üzrə dərslər də daxildir. Məlumat sosial şəbəkələrdə müsbət qarşılanıb və rəğbət doğurub.
Bu məqamda sual yaranır: ali təhsil müəssisələrində hansı sahələr üzrə fənlərin həftədə 4 gün keçirilməsi daha məqsədəuyğun ola bilər?
Mövzu ilə bağlı AzEdu.az-a açıqlama verən təhsil eksperti Ramin Nurəliyev bildirib ki, həftənin 4 günü dərs olması vəziyyəti az da olsa yüngülləşdirə bilər:
“Bakı Dövlət Universitetində ötən illərdə də bu məsələ ilə bağlı müvafiq təkliflər olmuşdu. Təklif həm tələbələr, həm valideynlər, həm də ictimaiyyət tərəfindən müsbət qarşılanmışdı. Bəzi ali təhsil müəssisələrində, o cümlədən Bakı Dövlət Universitetində belə hallar müşahidə olunur: tələbə birinci dərs saatına gəlir, ikinci saat boş keçir, sonra üçüncü dərsə qatılır. Bəzi hallarda isə ardıcıl iki saat boş qalır. Bu isə istər-istəməz tələbələr üçün narahatlıq yaradır.
Tələbə 90 dəqiqə müddətində ali təhsil müəssisəsində olur, amma faktiki olaraq heç bir dərs keçmir. Bu səbəbdən dərslərin həftənin 4 gününə sıxlaşdırılması məncə daha məqsədəuyğundur. Bu, həm tələbələr üçün daha rahat olar, həm də şəhər nəqliyyatı baxımından müəyyən qədər yüngülləşmə yaradar. Çünki həftənin 5 günü dərs keçirilməsi daha çox tələbə hərəkəti, daha çox nəqliyyat yükü, metro və digər ictimai nəqliyyat vasitələrindən daha sıx istifadə deməkdir. Həftənin 4 günü dərs olması bu baxımdan vəziyyəti az da olsa yüngülləşdirə bilər. Bu, nəqliyyat baxımından rahatlıq gətirməklə yanaşı, tədris prosesinə də müsbət təsir göstərə bilər. Çünki tələbə dərs cədvəlində boş vaxtlarla qarşılaşdıqda bu, müəyyən problemlərə və narahatlıqlara səbəb olur”.
Bəzi ixtisaslar üzrə həftəlik dərs saatları kifayət qədər çoxdur və bu halda tətbiqi çətin ola bilər:
“Narazılıqların aradan qaldırılması baxımından hesab edirəm ki, həftənin 5 günü əvəzinə 4 gün dərs keçirilməsi - bu, təkcə Bakı Dövlət Universiteti üçün deyil, bütün universitetlər üçün keçərlidir. Beləliklə, dərslər daha səmərəli şəkildə təşkil olunar və aradakı boş saatlar da aradan qalxar. Təsəvvür edin ki, bəzi hallarda tələbə həftədə 5 gün ərzində hər gün yalnız bir dərs üçün universitetə gəlir. Bu bir saatlıq dərs üçün tələbə evindən çıxır, universitetə gəlir, dərsə girir və sonra geri qayıdır.
Əgər dərslər 4 günə cəmləşdirilsə, tələbə bir gün ərzində 1 deyil, 3 və ya 4 dərs üçün universitetə gəlmiş olacaq. Bu həm səmərəlilik baxımından, həm də tələbənin vaxt və enerji itkisinin qarşısını almaq baxımından daha məqsədəuyğundur. Beynəlxalq təcrübədə də bu tətbiq olunur. Məsələn, Türkiyədə təhsil müəssisələrində dərslər adətən saat 9-da başlayır və 15:00-da başa çatır. Bu model bizdə də tətbiq oluna bilər. Belə olduqda dərslər saat 15:00-a qədər davam edər və həftənin 5 günü yox, 4 günü dərslərlə əhatə olunmuş olar”.
Bu yanaşma valideynlər, tələbələr və müəllimlər tərəfindən də ümumilikdə müsbət qarşılanır:
“Düşünürəm ki, bu istiqamətdə bütün ali təhsil müəssisələrində müvafiq addımların atılması sevindirici hal olar. Əlbəttə, bu yanaşma bütün ixtisaslar üçün uyğun olmaya bilər. Elə ixtisaslar var ki, onların həftəlik dərs saatları kifayət qədər çoxdur, bu halda tətbiqi çətin ola bilər. Lakin dərs saatları nisbətən az olan ixtisaslar üzrə bu sistemin tətbiqi daha məqsədəuyğun və ictimai baxımdan da müsbət qarşılanan bir qərar olar”.
