Süd artıran qidalar: Həkimdən analara tövsiyələr

Ana südünün körpələr üçün ən təbii və qoruyucu qida olduğu vurğulanır.


Pravda.az xatırladır ki, doğumdan sonra gələn ilk sarı südün uşaqları xəstəliklərdən qoruduğu və immunitet sistemini gücləndirdiyi bildirilir.


Mütəxəssisə görə, körpələrin ilk 6 ay ərzində yalnız ana südü ilə qidalanması kifayətdir. Ana südü protein, yağ, vitamin, mineral və hətta su tərkibi ilə körpənin bütün ehtiyaclarını qarşılayır. Bundan əlavə, ana südü həm uşaqların beyin inkişafına, həm də ananın emosional bağlılığına müsbət təsir edir.


Araşdırmalar göstərir ki, ana südü ilə qidalanan körpələrin gələcəkdə bəzi xəstəliklərə tutulma riski azalır, intellektual inkişafları daha güclü olur. Ana südü həmçinin həzm sisteminə, bağırsaq sağlamlığına və göz infeksiyalarına qarşı qoruyucu rol oynayır.


Ana südünü artırmaq üçün küncüt, reyhan, kimyon, yaşıl tərəvəzlər, sarımsaq, zeytun yağı, yulaf və bol su qəbulunun faydalı olduğu qeyd olunur.


Uşaqlarda gündəlik süd ehtiyacının onların çəkisinə görə dəyişdiyini nəzərə alsaq, 2 kiloqramlıq körpənin təxminən 300 ml, 5 kiloqramlıq körpənin isə 700 ml-dən çox südə ehtiyac duyduğu vurğulanır.


Həkimlər ana südündən məhrum qalan körpələrdə ishal, qulaq iltihabı, infeksiyalar, hətta piylənmə və şəkər kimi risklərin daha yüksək olduğunu da əlavə edirlər.


Qısaca, ana südü körpənin həm fiziki, həm də zehni inkişafı üçün ən vacib və əvəzsiz qida hesab olunur.


Əminə Bayramova