Vyanada keçirilən Avropa Diabet Tədqiqatları Assosiasiyasının illik konfransında təqdim olunan araşdırma siqaretin 2-ci tip diabet üçün ciddi təhlükə olduğunu təsdiqləyib.
Yeniavaz.com “Medical Xpress”ə istinadən xəbər verir ki, araşdırmaya 2-ci tip diabetli 3 325 nəfər və uzun müddət müşahidə altında saxlanılan 3 900 nəfər nəzarət qrupu daxil olub.
İsveç, Norveç və Finlandiyadan olan alimlər müəyyən ediblər ki, siqaret çəkənlərin 2-ci tip diabetin bütün alt növlərinə tutulma riski artır.
Nəticələr göstərib ki, siqaret çəkənlər siqaret çəkməyənlərə nisbətən insulinə davamlı ağır alt tip (SIRD) diabetə 2,15 dəfə daha çox tutulurlar. Digər alt tiplərdə də risk yüksəlib: SIDD-də 20%, MOD-da 29%, MARD-da isə 27%. Ağır siqaret çəkmə hallarında bu göstəricilər daha da artıb.
Tədqiqat həmçinin göstərib ki, Skandinaviyada geniş istifadə olunan tüstüsüz tütün (snus) da ağır alt tiplərin riskini artırır. Əlavə olaraq, diabetə genetik meyli olan insanlarda siqaret daha təhlükəli nəticələrə səbəb ola bilər. Məsələn, çox siqaret çəkən və insulin ifrazı zəif olan şəxslərdə SIRD riski 3,5 dəfədən çox yüksəlir.
