Cəlilabad rayonunun Göytəpə şəhəri ərazisində əhalinin rahat və təhlükəsiz hərəkətini təmin etmək məqsədilə bir sıra küçə və yollarda infrastrukturun yenilənməsi çərçivəsində asfaltlanma işlərinə başlanılmışdır. Bu, şəhərin gələcəyinə yönəldilən investisiyadır.
Yolların, küçələrin yenidən qurulması həm nəqliyyat sisteminin müasir tələblərə cavab verməsinə, həm də vətəndaşların gündəlik rahatlığının təmin olunmasına xidmət edir. Uzunmüddətli perspektivdə isə şəhərin daha gözəl və abad məkana çevrilməsinə zəmin yaradır. Belə ki, Cəlilabad Rayon İcra Hakimiyyətinin təşkilatçılığı ilə Göytəpə şəhər ərazisində Rövşən İsmayılov küçəsində 430 metr, İnqilab Niftullayev küçəsində 310 metr, Yusif Məmmədəliyev küçəsində 240 metr, Akif Xanışov küçəsində 315 metr və Vasif Hüseynov adına 2 saylı tam orta məktəbin həyətində asfaltlanma işləri yekunlaşmışdır. Savalan küçəsində 110 metr və N.Nərimanov küçəsi ilə Savalan küçəsini birləşdirən döngədə 94 metr asfalt örtüyünün çəkilməsi üçün işlər yekunlaşmış, yaxın günlərdə asfaltlanma işləri tamamlanacaqdır.
Görülən işlərdən razı qalan şəhər sakinləri küçələrin yüksək keyfiyyətlə asfaltlanmasını məmnuniyyətlə qarşılayıblar.
"Azərbaycan"
