Tramp Çarli Kirki Prezident Azadlıq medalı ilə təltif edəcəyini açıqlayıb
Ajans.az xəbər verir ki,Tramp bu barədə 11 Sentyabr terror aktlarının ildönümü ilə əlaqədar Pentaqonda keçirilən anım tədbirində çıxışı zamanı məlumat verib. “Başlamazdan əvvəl icazə verin, Çarli Kirkə qarşı törədilən bu qəddar sui-qəsd zamanı bütün amerikalıların keçirdiyi dəhşət və kədəri ifadə edim. O, öz nəslinin nəhəngi, azadlığın çempionu və milyonlarla insan üçün ilham mənbəyi idi,” – deyə Tramp bildirib. Tramp mərhumun ailəsinə başsağlığı verərək, Kirkin həyat yoldaşı Erika və övladlarının bu ağır itkini yaşadıqlarını qeyd edib. “Biz onun üçün çox darıxacağıq. Amma şübhə etmirəm ki, Çarlinin səsi və cəsarəti – xüsusilə gənclərin qəlbində – yaşamaya davam edəcək,” – deyə Tramp əlavə edib. Tramp Kirkin ölümündən sonra ona verilməsi planlaşdırılan Prezident Azadlıq medalının təqdimat tarixinin hələ müəyyən olunmadığını, lakin mərasimdə “çox böyük izdiham” olacağını vurğulayıb. Tramp çıxışdan sonra jurnalistlərə bildirib ki, mərhumun ailəsi ilə əlaqə saxlayıb. O, Kirkin həyat yoldaşı Erika ilə “uzun və ağır bir söhbət” etdiyini deyib. “O, tamamilə viran olmuşdu, bu itkini çox ağır keçirir,” – deyə sabiq prezident bildirib. Vitse-prezident Cey Di Vens (JD Vance) və həyat yoldaşı da Kirkin ailəsinə başsağlığı vermək üçün Yutaya səfər ediblər. Onlar mərhumun cənazəsinin Feniks şəhərinə yola salınmasında iştirak ediblər. Çarli Kirk ABŞ-da gənc mühafizəkarları bir araya gətirən və minlərlə kampusda fəallıq göstərən Turning Point USA təşkilatının həmtəsisçisi idi. O, həmçinin “The Charlie Kirk Show” adlı məşhur podkastın aparıcısı və bir neçə siyasi kitabın müəllifi idi. 31 yaşlı Kirk Trampın yaxın müttəfiqlərindən biri hesab olunurdu və onun 2020 və 2024-cü il seçki kampaniyalarında mühüm rol oynamışdı. Kirk, həmçinin Tramp ailəsinin bir sıra üzvləri ilə də sıx münasibət saxlayırdı.
