Bakı Apellyasiya Məhkəməsində əzab vermədə və seksual xarakterli hərəkətlərə məcbur etmədə təqsirləndirilən Namiq Cəfərovun (adı, soyadı şərtidir) barəsindəki hökmdən dövlət ittihamçısı tərəfindən verilən apellyasiya protesti və zərərçəkmiş şəxsin apellyasiya şikayətinə baxılıb.
Pravda.az-ın əldə etdiyi məlumata görə, sonuncu keçirilən prosesdə qərar elan olunub.
Məhkəmənin qərarına əsasən, dövlət ittihamçısının apellyasiya protesti və zərərçəkmiş şəxsin apellyasiya şikayəti təmin edilməyib.
İttihama görə, Namiq Cəfərov ailə-məişət münasibətləri zəminində rəsmi nikahda olduğu həyat yoldaşı Mələk Cəfərovaya (adı, soyadı şərtidir) qarşı davamlı olaraq zorakılıq və işgəncə hərəkətləri törədib. O, 2021-ci ilin oktyabr ayından 2023-cü ilin sentyabr ayına qədər müxtəlif vaxtlarda arvadının iradəsinə zidd olaraq fiziki zorakılığa, psixoloji təzyiqlərə və əxlaqsız hərəkətlərə məruz qoyub.
Belə ki, təqsirləndirilən şəxs ailə münasibətlərində əsassız qısqanclıq, qisasçılıq və aqressiya zəminində dəfələrlə arvadını nalayiq sözlərlə təhqir edib, müxtəlif vaxtlarda yumruq və təpik zərbələri vuraraq bədəninin müxtəlif nahiyələrinə xəsarətlər yetirib, boğazından tutaraq boğub, saçlarını yolaraq sürüyüb divara çırpıb, həmçinin bərk-küt əşyalarla vuraraq güclü fiziki ağrı və psixi iztirablar verib.
Bundan əlavə, Namiq Cəfərov zərərçəkmiş şəxsi onun razılığı olmadan intim xarakterli hərəkətlərə məcbur edib, qeyri-etik davranışlara məruz qoyaraq şəxsi ləyaqətini alçaldıb. O, bu hərəkətləri ailə mənzilində və digər ünvanlarda dəfələrlə həyata keçirib, hətta azyaşlı övladlarının gözü qarşısında zorakılıq göstərərək ailədə ağır psixoloji mühit yaradıb.
Nəticədə, zərərçəkmiş şəxs müxtəlif bədən xəsarətləri alıb, sağlamlığına yüngül və orta dərəcəli zərər yetirilib, eyni zamanda davamlı döymə və zorakı hərəkətlər səbəbindən güclü psixi iztirablara məruz qalıb.
İstintaq orqanı tərəfindən Namiq Cəfərovun əməli Cinayət Məcəlləsinin 133.2.6 (əzab vermə – təkrar törədildikdə) və 151-ci maddələri (seksual xarakterli hərəkətlərə məcbur etmə) ilə tövsif olunub.
Kamal Məmmədov
