.jpg)
"11 sentyabr terror aktı müasir dünyada beynəlxalq təhlükəsizliyə yanaşmada yeni mərhələ açdı. Bu hadisə bütün bəşəriyyətə göstərdi ki, terrorizm yalnız müəyyən region və ya dövlətin problemi deyil, qlobal miqyasda sülhə, sabitliyə və inkişaf proseslərinə qarşı yönəlmiş ciddi təhdiddir". Bu sözləri SİA-ya açıqlamasında hərbi ekspert Ramil Məmmədli deyib.
Onun sözlərinə görə, terrorizmə qarşı mübarizə yalnız ayrı-ayrı dövlətlərin deyil, beynəlxalq ictimaiyyətin birgə səyləri ilə aparılmalıdır: "İlk növbədə, dövlətlər arasında informasiya və kəşfiyyat məlumatlarının mübadiləsi gücləndirilməlidir. Çünki terror şəbəkələri çox vaxt sərhədlərdən asılı olmayaraq fəaliyyət göstərirlər. Onların maliyyə mənbələrinin, gizli əlaqələrinin və hərəkət marşrutlarının izlənməsi yalnız beynəlxalq əməkdaşlıq sayəsində mümkündür. İkinci mühüm istiqamət isə ideoloji mübarizədir. Terrorizm təkcə silah və zorakılıqla həyata keçirilmir, onun arxasında müəyyən radikal ideologiyalar dayanır. Buna görə də, gənclərin radikallaşmasının qarşısını almaq üçün təhsil, maarifləndirmə və sosial inteqrasiya proqramları mühüm əhəmiyyət daşıyır. Xüsusilə gənc nəsildə tolerantlıq, multikultural dəyərlər və milli həmrəylik ruhunun gücləndirilməsi terrorizmlə mübarizədə effektiv vasitədir. Üçüncüsü, terrorizmin maliyyə mənbələrinin qarşısını almaq vacibdir. Beynəlxalq maliyyə sistemində şəffaflıq artırılmalı, qeyri-leqal yollarla terrorçulara çatdırılan vəsaitlərin qarşısı alınmalıdır. Bu sahədə həm dövlətlərin, həm də beynəlxalq maliyyə qurumlarının birgə fəaliyyəti tələb olunur.
Nəhayət, hərbi və hüquqi mübarizə aspektini də qeyd etmək lazımdır. Dövlətlər öz sərhədlərini qorumaqla yanaşı, beynəlxalq hüquqa əsaslanan əməkdaşlıq çərçivəsində birgə antiterror əməliyyatları həyata keçirməlidirlər. Bu zaman əsas məqsəd yalnız terrorçu şəbəkələri zərərsizləşdirmək deyil, eyni zamanda münaqişə ocaqlarında dayanıqlı sülhün bərqərar olunmasına nail olmaqdır. 11 sentyabr hadisələri bir daha sübut etdi ki, terrorizmə qarşı mübarizə yalnız hərbi güclə deyil, kompleks yanaşma ilə aparılmalıdır. Bu, ideoloji, sosial, iqtisadi və siyasi sahələri əhatə edən çoxşaxəli bir prosesdir. Dövlətlər və beynəlxalq təşkilatlar bu məsələdə həmrəy olduqları halda, qlobal terrorizmin təsir gücü minimuma enəcəkdir".
