Psixoloji travma insanı həddindən artıq qorxuya salan, çarəsizlik yaradan, adətən gözlənilməz və qeyri-adi hadisələrin təsirindən yaranan vəziyyətdir.
Pravda.az bildirir ki, müharibələr, partlayışlar, təbii fəlakətlər, işgəncə, zorlama, qəzalar və şiddət hadisələri buna səbəb ola bilər.
Travmanın təsiri hər kəsdə eyni olmur. Keçmiş yaşantılar, stresslə mübarizə bacarığı, sosial dəstək və genetik xüsusiyyətlər də rol oynayır. Travma sonrası bir sıra psixoloji problemlər ortaya çıxa bilər.
Psixoloji tramvanın əsas əlamətləri:
Yenidən yaşama: Qarabasmalar, hadisəni tez-tez xatırlama, sanki yenidən yaşayırmış kimi hiss etmə.
Qaçınma: Hadisəni xatırladan yerlərdən, söhbətlərdən uzaq durma.
Artmış həyəcan: Yuxusuzluq, əsəbilik, tez qıcıqlanma, diqqət dağınıqlığı.
Mütəxəssislər bildirirlər ki, travma sonrası stress pozuntusunun müalicəsində həm dərmanlar, həm də psixoloji terapiya təsirlidir. Əsas addım isə yardım almaqdan çəkinməməkdir.
Qeyd: Əgər sizdə və ya yaxınlarınızda travma ilə bağlı psixoloji problemlər müşahidə olunursa, mütləq mütəxəssisə müraciət edin.
Əminə Bayramova
