ABŞ Konqresinin Nümayəndələr Palatası 2026-cı maliyyə ili üçün (oktyabrın 1-dən başlayır) təxminən 900 milyard dollarlıq hərbi xərcləri, o cümlədən Ukraynaya 400 milyon dollarlıq yardım nəzərdə tutan qanun layihəsini təsdiqləyib.
Operativ Media xəbər verir ki, qanun layihəsinin lehinə 231, əleyhinə 196 səs verilib. Nümayəndələr Palatası əsasən partiyalara görə bölünüb. Hazırda azlıqda olan Demokrat Partiyasının 17 üzvü qanun layihəsinin lehinə səs verib, yalnız dörd respublikaçı (çoxluq partiyası) bitərəf qalıb.
Sənəddə Ukraynaya hərbi yardım üçün 400 milyon dolların ayrılması nəzərdə tutulur. Bu vəsait Ukraynaya Təhlükəsizliyə Yardım Təşəbbüsü (USAI) çərçivəsində ayrılacaq. Bu təşəbbüs çərçivəsində ABŞ Müdafiə Nazirliyi avadanlıq və resursları birbaşa təmin etmək əvəzinə, istehsalçılarla müqavilələr bağlayacaq.
Qanunvericilər, həmçinin ABŞ administrasiyasının Ukraynaya əvvəllər Konqres tərəfindən təsdiq edilmiş yardımı ləğv etmək və ya dayandırmaq qərarına gələcəyi halda, Pentaqonun onlara məlumat verməsini tələb edən müddəa da daxil ediblər.
Senat qanun layihəsinin öz variantını nəzərdən keçirir. Qəbul edildikdən sonra yekun sənəd xüsusi komissiya tərəfindən hazırlanacaq və yalnız bundan sonra ABŞ prezidenti Donald Trampa imzalanması üçün təqdim olunacaq.
