Ses qazeti saytına istinadən ain.az xəbər verir.
Valentina Çebotaryevanın 20 yaşı var. O, Azərbaycanın ən məşhur molokan (rus) kəndlərindən birində - ölkənin şimal-qərbinin səfalı guşələrindən birində - İsmayıllı rayonunda yerləşən İvanovkada doğulub boya-başa çatıb. Valentina dəyişiklikdən qorxmur və həmişə irəli getməyə hazırdır. Bu yaxınlarda Valentina İvanovkanın tam mərkəzində tikilmiş yeni otelin direktoru oldu. “Moskva-Baku” portalına müsahibə verən Valentina Çebotareva İvanovkadakı həyatdan və onun böyük mehriban ailəsindən danışıb. Müsahibəni oxucularımıza təqdim edirik.
- Valentina, siz İvanovkada doğulub boya-başa çatmısınız. Ailəniz haqqında bizə məlumat verin. Azərbaycanın məşhur molokan kəndində həyat necədir?
- Burda həyat yaxşıdır. İvanovkada müxtəlif millətlərin və dinlərin nümayəndələri yaşayır. Müsəlmanlar, molokanlar, baptistlər, pravoslavlar. Ailəmizdə 7uşaq var. Mən ikincisiyəm. Böyük qardaşım Nikolayın 22 yaşı var, “Aqro Qurama”da mühəndis işləyir, kiçik bacım Diananın isə 2 yaşı var. Atam Sergey Nikolayeviç də “Aqro Qurama”da işləyir. Anam Natalya Vladimirovna evə və uşaqlara baxır. Biz mehriban ailəyik, çox yaxınıq, həmişə bir-birimizə dəstək oluruq. Biz bacılar, ev işlərində anamıza kömək edirik, kiçik uşaqlara baxırıq. Qardaşlarım və atam evdə kişi işləri görür. Məktəbdən sonra Bakıda dizayner ixtisası üzrə təhsil almaq istəyirdim, amma həyat başqa istiqamətə çəkdi.
Mən Krasnodarda xor rəhbərlərini - kilsə gənclər xorunun rəhbərlərini- hazırlanması üçün təşkil olunan kursa daxil oldum. Təhsilimi bitirib evə qayıtdım. Bakıda mühasibatlıq kursları oxudum və bir neçə ay Azərbaycan paytaxtında təcrübə keçdim. Sonra Salehardda baptist könüllülər hərəkatı haqqında öyrəndim. Onlara yazdım və onlar mənə Rusiyanın Uzaq Şimalına - Yamalo-Nenetskiy Muxtar Dairəsinə getmək üçün öz könüllü dəstələrinə qoşulmağı təklif etdilər. Avqustdan oktyabr ayına qədər 3 ay ərzində biz tundranı gəzirdik, çatmaq çətin olan yaşayış məntəqələrinə ərzaq və paltar çatdırırdıq. Soyuq olsa da, inanılmaz dərəcədə maraqlı idi- sentyabrda artıq mənfi 20 idi! Cənublu kimi mənim üçün soyuğa uyğunlaşmaq kifayət qədər çətin idi, amma bacardım. Dayanacaqlarda uşaqlarla göbələk və giləmeyvə yığdığımı, odda yemək bişirdiyimizi xatırlayıram. Hamı dost oldu. Bu, əsl həyat məktəbi idi! Sibiri o qədər bəyəndim ki, hətta birdəfəlik ora getmək istədim. İvanovkaya qayıtdıqdan sonra lazımi sənədləri toplamağa başladım, amma gözlənilmədən məni doğma kəndimdəki yeni “Maqnoliya” mehmanxanasına işə dəvət etdilər. Mənə özümü direktor kimi sınamağı təklif etdilər. Təbii ki, dərhal razılaşdım.
- 20 yaşında otel direktoru olmaq böyük məsuliyyətdir. Onun öhdəsindən gələ bilərsinizmi?
- Etiraf edirəm, əvvəlcə asan olmadı. Otel təzədir, cəmi 3 ay əvvəl açılıb və mən otel biznesinə yeni başlayanam. Amma təcrübəli həmkarlar mənə kömək edir, hər gün praktikada öyrənirəm. Düşünürəm ki, gənclik sizə yeni şeyləri daha tez qavramağa kömək edir. 14 otağımız və 4 kottecimiz var, yaxınlıqda "İvan" restoranı var - rahat yerdir. Bu yaxınlarda il boyu fəaliyyət göstərəcək bir SPA zonası açıldı. Xüsusilə yay-qış aylarında turistlər çox olur, çünki İvanovka təbii məhsulları ilə məşhurdur. İnsanlar tez-tez bura İvanovka məhsulları üçün gəlirlər. Onların istehsalında bizim ailə də iştirak edir: kimsə yağ, pendir, kəsmik hazırlayır, kimsə arıçılıqla məşğuldur. Turistlərin çoxu da əcnəbidir, onlar ivanovkalıların necə yaşadığını görmək, onların adət-ənənələri ilə tanış olmaq üçün gəlirlər.
- Ailəniz haqqında danışın. Deyəsən çox isti münasibətiniz var!
- Bəli, bizim böyük və mehriban Çebotaryevlər ailəmiz var. Biz ümumi süfrəyə toplaşanda 40 nəfərdən çox oluruq, bu hələ hamlsl deyil - bəzi qohumlar şəhərə köçüb. Mənim babam və nənəm də İvanovkada yaşayır. Atam tərəfdən babam Nikolay Viktoroviç Çebotaryev çəkməçidir, yüksək keyfiyyətli ayaqqabı tikir. Yeri gəlmişkən, o da çoxuşaqlı ailədəndir - 7 oğul və 1 qız. Nənəm Qalina Nikolayevna təqaüddədir. Anam tərəfdən babam Vladimir Nikolayeviç Uvarov mexanik, nənəm Valentina Matveyevna isə uzun müddət keçmiş Nikitin kolxozunun idarəsində işləyib. Səbəbsiz yerə yığışmağı, ünsiyyət qurmağı, xəbər paylaşmağı xoşlayırıq. Bu bizim üçün vacibdir.
- Baptist olduğunuzu qeyd etdiniz. İnancınız həyatınıza necə təsir edir?
- Mən möminəm. Hər bazar günü mən və ailəm xidmət üçün yerli kilsəyə gedirik. Mənim üçün iman, ailə kimi, həyatın əsasını təşkil edir, qərarlar qəbul etməyə və çətinliklərin öhdəsindən gəlməyə kömək edir. Nə qədər çətin vəziyyətdə olsam da, bilirəm ki, Rəbb bizə gücümüzə uyğun imtahan verir. Saleharda getmək qərarına gələndə anam əvvəlcə narahat olsa da, valideynlərim məni dəstəklədilər. Onlar mənə dedilər: “Get, bu o deməkdir ki, Allahın sənin üçün öz planları var!”
İman mənə Allahın planına etibar etməyi öyrədir. Gələcək həyat yoldaşımın da inanclı olmasını və mənim dəyərlərimi bölüşməsini istəyirəm. Yeri gəlmişkən, bu il Baptistlərin Qara dənizdə yerləşən Belıy adasına səyahəti planlaşdırılır və mən də könüllülərə qoşulmaq istəyirəm. İşlə birləşdirə bilsəm, mütləq ora gedəcəm. Mən macəraları sevirəm və çətin şərtlərdən qorxmuram.
- İvanovkada gənclər vaxtlarını necə keçirirlər? Onlar üçün maraqlı bir şey varmı?
- Düzünü desəm, İvanovka gənclər üçün bir az darıxdırıcıdır. Bir çox insan daha böyük imkanlar üçün Bakıya getməyə çalışır. Amma biz kəndi dirçəltməyə çalışırıq: diskoteka təşkil edirik, yeni fəaliyyətlər planlaşdırırıq. Məsələn, uşaq meydançasının və göl kənarında istirahət zonasının açılması ilə biz daha çox gəncin cəlb olunmasına ümid edirik. İstəyirəm ki, İvanovka təkcə turistlər üçün deyil, yerli əhali üçün də maraqlı olan yerə çevrilsin.
- Valentina, gələcəyinizi necə görürsünüz?
- Mən təbiətcə optimistəm. İnanıram ki, qaranlıq bir zolaqdan sonra həmişə işıqlı bir zolaq gəlir. Hər şey Allahın əlindədir və hiss edirəm ki, O, mənə yol göstərir. Həyatda baş verən hər şey təsadüfi deyil. Həyatda ümumiyyətlə qəza yoxdur. Məktəbdə oxuyarkən mamaça və ya dizayner olmaq arzusunda idim, amma otel direktoru oldum. Belə alındı. Yeri gəlmişkən, mən dizaynla da məşğulam, özümü inkişaf etdirirəm - otelin reklamı ilə məşğul oluram. Uşaqlarla mənim də İvanovka məhsullarının bütün Azərbaycan üzrə çatdırılması xidmətini təşkil etmək fikrimiz var. Bu əla olardı! Mən yeni imkanlara açığım və hər şeyin lazım olduğu kimi alınacağına inanıram.
Tərcümə - Elçin Bayramlı
Yazı Azərbaycan Respublikasının Medianın İnkişafı Agentliyinin maliyyə dəstəyi ilə “Dini və milli tolerantlıq, millətlərarası münasibətlərin inkişaf etdirilməsi” istiqaməti çərçivəsində hazırlanıb
Ən son xəbərləri və yenilikləri almaq üçün ain.az saytını izləyin.
