Rusiyanın Ukrayna kəndinə hücumu nəticəsində 20-dən çox insan həlak olub
Ajans.az xəbər verir ki,prezidentin sözlərinə görə, həlak olanlar pensiyalarını almaq üçün toplaşan sadə insanlar olub. Zelenski bu barədə sosial şəbəkələrdə paylaşdığı videomüraciətində məlumat verib. Donetsk vilayətinin rəhbəri Vadim Filkaşkin isə bildirib ki, hadisə yerində təcili yardım briqadaları işləyir, yaralıların sayı da ölənlərin sayı qədərdir. Yaralılar yaxınlıqdakı xəstəxanalara yerləşdirilib. Zərbə Slovyansk şəhərinin şimalında yerləşən Yarova kəndinə endirilib. Bu bölgə Rusiya qüvvələrinin şərq cəbhəsində yavaş-yavaş irəlilədiyi ərazidə yerləşdiyi üçün ciddi risk zonası hesab olunur. Əgər hücum nəticəsində ölənlərin sayı təsdiqlənsə, bu, Rusiyanın 2022-ci ilin fevralında başladığı müharibədən bəri Ukrayna vətəndaşlarına qarşı ən ağır hücumlardan biri olacaq. Zelenski hücumun görüntülərini yayımlayaraq, Rusiyanın bu kimi hərəkətlərini “təsvir etməyə söz tapmadığını” deyib və beynəlxalq ictimaiyyəti — xüsusilə ABŞ, Aİ və G20 ölkələrini — münasib cavab verməyə çağırıb. “Dünya bu vəhşiliyə səssiz qalmamalıdır,” – deyə Zelenski vurğulayıb. Xatırladaq ki, avqustun sonunda Kiyevə edilən aviazərbələrdə azı 23 nəfər həlak olmuşdu. Həmin hadisə Ukrayna paytaxtına qarşı həyata keçirilən ən dağıdıcı hücumlardan biri kimi qiymətləndirilmişdi. Həftə sonu isə Rusiya Kiyevə indiyədək ən böyük hava hücumunu təşkil edərək əsas hökumət binalarından birini hədəf almışdı. Rusiya Müdafiə Nazirliyi hələlik Yarova kəndinə hücumla bağlı rəsmi açıqlama verməyib.
