Redaktor.az saytından verilən məlumata əsasən, ain.az məlumatı açıqlayır.
"Uşaqlarda diqqət əksikliyi həm təhsil prosesinə, həm də gündəlik fəaliyyətlərə mənfi təsir göstərə bilən mühüm bir problemdir. Bu hal təkcə dərs nailiyyətlərini zəiflətmir, eyni zamanda uşağın özünəinamına, sosial münasibətlərinə və emosional inkişafına da təsir edir".
Bu fikirləri Redaktor.az-a açıqlamasında pediatr Şəlalə Poluxova uşaqlarda diqqət əksikliyindən danışarkən bildirdi.
"Ən çox rast gəlinən səbəblər arasında yuxu rejiminin pozulması, uzunmüddətli ekran istifadəsi, emosional gərginlik, qeyri-düzgün qidalanma və fiziki aktivliyin azlığı xüsusi yer tutur. Vaxtında yatmayan uşaqlar gün ərzində yorğun, halsız və əsəbi olur, nəticədə diqqətlərini toplamaqda çətinlik çəkirlər. Telefon, planşet və televizor qarşısında uzun müddət qalmaq uşağın beynini passivləşdirir, bu da dərs prosesində və gündəlik işlərdə diqqətin tez yayınmasına gətirib çıxarır.
Qidalanma da diqqət formalaşmasında mühüm rol oynayır. Vitamin, dəmir və omeqa-3 çatışmazlığı, eləcə də şəkərli və hazır qidaların həddindən artıq istifadəsi uşağın konsentrasiya qabiliyyətini zəiflədə bilər. Fiziki aktivliyin azlığı isə beynin qan dövranını zəiflədir, nəticədə yaddaş və diqqət göstəriciləri aşağı düşür. Bəzi hallarda isə diqqət problemi daha ciddi tibbi vəziyyətlə, yəni diqqət pozuntusu-hiperaktivlik sindromu (ADHD) ilə bağlı ola bilər. Bu halda uşağın mütəxəssis nəzarətinə ehtiyacı yaranır".
Pediatr problemin qarşısını almaq üçün valideynlərə bir sıra tədbirlər görməyi tövsiyə etdi:
"İlk növbədə uşaqların kifayət qədər və vaxtında yatması təmin olunmalı, sağlam və balanslı qidalanma vərdişləri formalaşdırılmalıdır. Gündəlik fiziki aktivlik açıq havada oyunlar, idman və hərəkətli fəaliyyətlər uşağın həm sağlamlığına, həm də diqqətinə müsbət təsir göstərir. Ev şəraitində sakit və diqqəti yayındırmayan mühitdə dərs oxumaq, ekran vaxtını məhdudlaşdırmaq (xüsusilə də yatmazdan ən azı iki saat əvvəl texnologiyadan uzaq qalmaq) olduqca vacibdir. Bundan əlavə, uşağın kiçik uğurları valideynlər tərəfindən qiymətləndirilməli və mükafatlandırılmalıdır. Bu, uşağın motivasiyasını və diqqətini daha da gücləndirir. Əgər bütün bu tədbirlərə baxmayaraq, diqqət dağınıqlığı davamlı xarakter alırsa və uşağın gündəlik fəaliyyətinə ciddi təsir göstərirsə, pediatra və uşaq psixoloquna müraciət olunması vacibdir. Erkən müdaxilə həm təhsil, həm də sosial həyat baxımından uşağın gələcək inkişafına müsbət təsir göstərir", - deyə Şəlalə Poluxova yekunlaşdırdı.
Xədicə BAXIŞLI
Hadisənin gedişatını izləmək üçün ain.az saytında ən son yeniliklərə baxın.
