Türkiyənin xarici işlər naziri Hakan Fidan ölkəsinin hava məkanını İsrail üçün bağladığını və türk gəmilərinin İsrail limanlarına daxil olmasını qadağan etdiyini bildirib.
NOCOMMENT.az bildirir ki, bu barədə TASS agentliyi məlumat yayıb.
Fidan Türkiyə parlamentinin Qəzza zolağındakı vəziyyətin müzakirə edildiyi fövqəladə iclasında deyib: “Biz İsraillə ticarəti tamamilə dayandırmışıq, türk gəmilərinin İsrail limanlarına daxil olmasına icazə vermirik. İsrail təyyarələrinin bizim hava məkanımıza daxil olmasına icazə vermirik. İsraillə ticarət əlaqələrini tamamilə dayandıran ikinci ölkə yoxdur”.
Türkiyə Xarici İşlər Nazirliyi rəhbərinin sözlərinə görə, İsrail “aclıqdan silah kimi istifadə edərək” Qəzzaya humanitar yardımın paylanmasının qarşısını alır. “İsrail dövlət terroru həyata keçirməkdə davam edir. Qəzzada soyqırım getdikcə pisləşir”, – Fidan qeyd edib.
Türkiyə hakimiyyəti daha əvvəl respublikanın 2024-cü ilin mayında İsraillə ticarəti tamamilə dayandıracağını bildirmişdi.
