Ukrayna Silahlı Qüvvələri hazırkı cəbhə xəttindən geri çəkilməyəcək. Döyüş meydanında pilotsuz təyyarələrin intensiv istifadəsi səbəbindən artıq “bufer zona” adlanan ərazi yaradılıb.
Reyting.az xəbər verir ki, bunu Ukrayna prezidenti Vladimir Zelenski deyib.
Dövlət başçısı Avropa liderlərinin gələcək sülh sazişi çərçivəsində guya cəbhədə 40 kilometrlik bufer zonanın yaradılması imkanının nəzərdən keçirməsi ilə bağlı mətbuatda yayılan xəbərlərə münasibət bildirib. Zelenskinin sözlərinə görə, dronların intensiv istifadəsi səbəbindən cəbhədə “ölü zona” yaranıb və dronların vurduğu hər şey artıq geri çəkilib.
“Mən bunu avropalılardan və amerikalılardan dəfələrlə eşitmişəm. Bunu bəzi həmkarlarıma izah etməyə çalışdım. Yeri gəlmişkən, bəziləri bunu çox düzgün başa düşür. Yalnız bugünkü müharibənin texnoloji vəziyyətini başa düşməyənlər qırx, əlli, altmışlıq bufer zonası təklif edirlər, hətta mən 100 kilometrlik təklifi eşitmişəm. Bu gün hər birimizdə ölü zonadan 10 kilometr içərilərə doğru çox ağır silahlar var. Çünki hər şey dronlarla vurulur, mən onu “ölü zona” adlandırıram, kimsə ona “boz zona” deyir”,- Zelenski əlavə edib.
Dövlət başçısı qeyd edib ki, vaxt itirməyə, müxtəlif məqamlara, Rusiyadan gələn əlavə şərtlərə və ya hansısa başqa “xəyalpərəstlərə” baş qoşmağa ehtiyac yoxdur.
“Bufer zona mövcuddur. Əgər Rusiya bizdən daha çox məsafə saxlamaq istəsə, onlar Ukraynanın müvəqqəti işğal olunmuş ərazilərinə daha dərindən çəkilə bilərlər. Bunun üçün bizə heç nə lazım deyil”, - deyə Zelenski vurğulayıb.
Prezidentin əlavə etdiyi kimi, dronlar müəyyən məsafədə hər şeyi yandırdığı üşün hər şey çoxdan geri çəkilmişdi: “Yəni, heç bir yerdə heç nəyi gecikdirməyə ehtiyac yoxdur. O, artıq çoxdan geri çəkilib”.
Bu baxımdan o, Rusiya ordusunun yerləşdiyi cəbhə xəttinə diqqət yetirməyi təklif edib: “Zirehli texnika haradadır? Tanklar haradadır? Sıfır. Artıq heç nə yoxdur. Heç kim irəliləmir, çünki hamı texnikasını itirir. Gecə-gündüz. İstənilən an. Ona görə də bu, sadəcə, lazımsız söhbətdir”, - Zelenski izah edib.
Dövlət başçısı xatırladıb ki, Minsk prosesi çərçivəsində 2014-cü ildən sonra Donetsk və Luqansk vilayətlərində qoşunların çıxarılması artıq razılaşdırılıb, lakin bu geriçəkilmə heç bir nəticə verməyib.
ELÇİN
