"Prezident İlham Əliyevin Kəlbəcərə səfəri və Böyük Qayıdış proqramı çərçivəsində bölgədə aparılan işlər Azərbaycanın dövlətçilik tarixində mühüm mərhələ kimi qiymətləndirilməlidir. Bu prosesin mahiyyəti təkcə insanların öz ata-baba torpaqlarına dönməsi ilə bağlı deyil, eyni zamanda azad edilmiş ərazilərin ölkənin ümumi inkişaf strategiyasına inteqrasiyası, yeni iqtisadi və sosial modelin qurulması ilə əlaqədardır". Bu sözləri SİA-ya açıqlamasında politoloq Elşad Həsənov deyib.
Onun sözlərinə görə, Kəlbəcər strateji baxımdan xüsusi əhəmiyyətə malik bölgələrdən biridir. Onun bərpası həm təhlükəsizlik, həm də iqtisadi potensial baxımından Azərbaycan üçün açar rolunu oynayır. Prezidentin bu bölgəyə mütəmadi səfərləri, yeni müəssisələrin, sosial obyektlərin və infrastruktur layihələrinin açılışında iştirakı dövlətin regionun gələcəyinə verdiyi önəmin bariz nümunəsidir: "Burada aparılan işlər yalnız yerli əhalinin rahat qayıdışını təmin etmir, həm də Kəlbəcəri ölkənin ümumi iqtisadi xəritəsində mühüm mərkəzə çevirir. Böyük Qayıdış proqramı Azərbaycanın işğaldan azad olunmuş torpaqlarında həyata keçirdiyi ən genişmiqyaslı dövlət siyasətlərindən biridir. Bu siyasət həm vətəndaşların sosial rifahının bərpasına, həm də regionda dayanıqlı inkişafın təmin edilməsinə yönəlib. Kəlbəcərdə yeni yolların, elektrik və su infrastrukturunun, məktəb və xəstəxanaların inşası, kənd təsərrüfatı və turizm potensialının inkişaf etdirilməsi Böyük Qayıdışın strateji hədəflərinin tərkib hissəsidir.
Ən əsası isə, bu proses təkcə Azərbaycan daxilində deyil, beynəlxalq müstəvidə də böyük əhəmiyyət daşıyır. Çünki Azərbaycan dünyaya nümayiş etdirir ki, müharibədən sonrakı bərpa və reinteqrasiya prosesini qısa müddətdə və səmərəli şəkildə həyata keçirmək mümkündür. Bu, ölkəmizin sülhə, sabitliyə və inkişaf modelinə sadiqliyini göstərir.
Beləliklə, Prezidentin Kəlbəcərə səfəri yalnız simvolik xarakter daşımır, eyni zamanda Böyük Qayıdış proqramının praktik icrasının və Azərbaycanın yeni inkişaf mərhələsinin göstəricisidir. Bu siyasət yaxın illərdə həm bölgənin, həm də bütövlükdə ölkənin sosial-iqtisadi xəritəsini köklü şəkildə dəyişəcək".
