ain.az, Azertag saytından verilən məlumata əsaslanaraq xəbər yayır.
London, 29 avqust, AZƏRTAC
Yeni elmi araşdırmaya görə, 1939-cu ildən sonra doğulanların orta hesabla 100 yaşa qədər yaşaması az ehtimal olunur.
AZƏRTAC “Independent”ə istinadla xəbər verir ki, “PNAS” jurnalında dərc olunan araşdırma ilə bağlı yüksək gəlirli və ölüm göstəriciləri aşağı olan 23 ölkənin uzunömürlülük statistikası təhlil edilib. Tədqiqatçılar “Human Mortality Database” məlumatlarından və altı fərqli ölüm proqnozlaşdırma metodundan istifadə edərək müəyyənləşdiriblər ki, ötən əsrin əvvəlində əldə olunan uzunömürlülük artımı son onilliklərdə xeyli zəifləyib.
Amerika Birləşmiş Ştatlarının Viskonsin Medison Universitetindən olan tədqiqatın həmmüəllifi Hektor Pifarrei Arolas bildirib ki, XX əsrin ilk yarısında əldə edilən misilsiz ömür uzunluğu artımı yaxın gələcəkdə təkrarlanması çətin olan bir məsələdir. O, əlavə edib ki, insanın ömrünü nəzərəçarpacaq dərəcədə uzadan irəliləyişlər əldə olunmadığı halda, hətta yetkin yaşda sağqalma tempi iki dəfə artsa belə, ömür uzunluğu əvvəlki sürətlə davam etməyəcək.
Məlumata görə, 1900-1938-ci illərdə hər yeni nəsildə ömür uzunluğu orta hesabla 5,5 ay artırdı. 1900-cü ildə yüksək gəlirli ölkələrdə doğulan bir insanın orta ömrü 62 il olduğu halda, cəmi 38 il sonra, 1938-ci ildə bu göstərici artıq 80 ilə çatmışdı.
Aytən Abbaslı
AZƏRTAC-ın xüsusi müxbiri
London
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
