BMT Təhlükəsizlik Şurasında Qəzza ilə bağlı gərgin müzakirələr
BMT Təhlükəsizlik Şurasında keçirilən son iclasda 15 üzvdən 14-ü, o cümlədən İsrailin müttəfiqləri Fransa və Böyük Britaniya Qəzzada kütləvi aclığın "süni şəkildə yaradıldığını" bəyan edib. ABŞ isə bu fikrə qarşı çıxan yeganə dövlət olub.
Moderator.az xəbər verir ki, by barədə "TRT Global" nəşri yazıb.
Məlumatda deyilir ki, Təhlükəsizlik Şurasının üzvləri ortaq bəyanatla aclığın silah kimi istifadəsinin beynəlxalq humanitar hüquqla qadağan olunduğunu xatırladaraq, dərhal və şərtsiz atəşkəsə, bütün girovların azad olunmasına, humanitar yardımın əhəmiyyətli dərəcədə artırılmasına və İsrailin yardımın qarşısındakı məhdudiyyətləri ləğv etməsinə çağırış edib.
"Qəzzadakı aclıq dərhal dayandırılmalıdır. Zaman bitir. İsrail kursunu dəyişməlidir", - sənəddə deyilir. Qida Təhlükəsizliyi üzrə Beynəlxalq Layihənin son hesabatına görə, hazırda Qəzzada yarım milyondan çox insan kəskin qida çatışmazlığından əziyyət çəkir, yaxın aylarda bu rəqəmin 640 min nəfərə çatacağı proqnozlaşdırılır.
Lakin İsrail bu hesabatı manipulyativ adlandıraraq kəskin şəkildə rədd edib. Xarici İşlər Nazirliyinin baş direktoru Eden Bar Tal sənəddə "kobud saxtakarlıqların" olduğunu bildirib və hesabat geri götürülməsə, donor ölkələrdən layihənin maliyyələşdirilməsini dayandırmağı tələb edəcəyini açıqlayıb.
ABŞ-ın BMT-dəki nümayəndəsi Doroti Şi də hesabatın etibarlılığına şübhə etsə də, Qəzzada humanitar böhranın mövcudluğunu etiraf edib. Rusiya nümayəndəsi Dmitri Polyanski isə Vaşinqtonu ittiham edərək, ABŞ-ın İsrailə açıq dəstəyinin Təhlükəsizlik Şurasının böhranı düzgün müzakirə etməsinə mane olduğunu bildirib.
BMT-nin 500 əməkdaş İsraili soyqırımda ittiham etməyi tələb edir
BMT-nin Cenevrədəki İnsan Haqları üzrə Ali Komissarlığında çalışan təxminən 500 əməkdaş rəhbər Volker Türkə müraciət edərək, İsrailin Qəzzadakı müharibəsinin soyqırım kimi tanınmasını tələb edib.
Müraciətdə deyilir ki, iki ilə yaxın davam edən müharibə ərzində soyqırımın hüquqi meyarları yerinə yetirilib və buna görə də BMT-nin susması təşkilatın nüfuzunu ciddi şəkildə zədələyir. Onlar həmçinin Ruandadakı 1994-cü il soyqırımını xatırladaraq, beynəlxalq ictimaiyyətin oxşar səhvi təkrarlamaması üçün xəbərdarlıq ediblər.
Türk isə cavabında baş verənlərdən mənəvi sarsıntı keçirdiyini və beynəlxalq ictimaiyyətin passivliyindən narazı olduğunu bildirib. Lakin "soyqırım" ifadəsini işlətməkdən çəkinib və əməkdaşları birliyə çağırmaqla kifayətlənib. Rəsmi BMT xətti isə dəyişməyib - təşkilat bu anlayışın hüquqi qiymətləndirilməsinin yalnız beynəlxalq məhkəmələrin səlahiyyətinə aid olduğunu vurğulamağa davam edir.
Beləliklə, həm Təhlükəsizlik Şurasında, həm də BMT-nin daxilində İsrailin Qəzzadakı hərəkətləri ətrafında ciddi fikir ayrılıqları mövcuddur. ABŞ İsraili müdafiə etməkdə davam edir, Avropanın böyük hissəsi isə humanitar böhranın "insan əli ilə yaradıldığı" qənaətindədir. BMT-dəki daxili narazılıqlar isə təşkilatın özünün nüfuzunu sınağa çəkir.
