BAKI, 29 avqust. TELEQRAF
Əməkdar artist Aybəniz Haşımova Teleqraf İnformasiya Agentliyinin suallarını cavablandırıb.
Onunla müsahibəni təqdim edirik.
- Aybəniz xanım, qızınız blogger Aynişan Quliyeva Venesiya Film Festivalında iştirak etdi. Təəssüratlarınızı eşitmək istərdik.
- Qızım “Armani Beauty”nin dəvəti ilə Beynəlxalq Venesiya Film Festivalında iştirak etdi. Bu gün vətənə gəlir. Hər kəsə təşəkkür edirəm. Bu, təkcə Aynişanın uğuru deyil, bütün Azərbaycan üçün əlamətdar hadisədir. Bir azərbaycanlı qızı Azərbaycanın siması olaraq nüfuzlu tədbirə təqdim olunub. Festivalda Aynişan "Armani Beauty"nin təmsilçisi kimi çıxış edib.
Dünən qızımın görüntülərə baxanda elə bildim, yuxudayam, nağıldayam. Mən ifaçı olaraq hər zaman tələbələrimin yüksək yerlərdə çıxış etməsini arzulamışam.
Aynişan təklifi alanda çox sevindi, dedi, ana, sənə bir xəbərim var, məni Beynəlxalq Venesiya Film Festivalına dəvət ediblər. Açığı, mən də çox sevindim. Buna necə sevinməmək olar ki? Düşünürəm ki, Aynişan hər bir gəncin gözəl arzusunu öz simasında təmsil etdi. Arzu edirəm ki, Azərbaycanın bütün övladları belə uğurlar qazansınlar.
Sevinirəm ki, dünyanın bir çox brendləri Aynişanın şəkillərini öz səhifələrində, jurnalların üz qabıqlarında paylaşdılar.
- İnsanlar Aynişan Quliyevanın Azərbaycanın siması kimi təqdim olunmasına necə reakiya göstərdilər?
- Bizi tanıyan hər kəs sevinir. Mənə çoxlu zənglər və mesajlar gəlir. Allah hamını sevindirsin, Azərbaycanın bütün övladlarını qorusun. Harada olurlar-olsunlar, həmişə ölkəmizin adını yüksəkdə tutmağa müvəffəq olsunlar.
- Qızınızı blogger kimi dəstəkləyirsinizmi və ilk gündən bu qədər uğur qazanacağını gözləyirdinizmi?
- Mənim yanaşmam odur ki, bir işə başlayanda nəticəni əvvəlcədən düşünmək olmaz. Uğur mərhələ-mərhələ gəlir və bu, yalnız zəhmətin bəhrəsidir. Uzun illərdir incəsənət sahəsindəyəm, yaxşı bilirəm ki, zəhmətsiz uğur olmur. Uğurun açarı zəhmətdir.
Açığını deyim, bloggerlik mənə əvvəl yad idi. Çünki mən köhnə nəslin adamıyam. Ona görə mənim kimilərə yenilikləri qəbul etmək bir az vaxt aparır. Amma gördükdə çox sevinirəm. Dünyaya çıxan bloggerlərimiz var və bu bizim uğurumuzdur.
Aynişan da bu sahədə ilk azərbaycanlı övladlardan biridir və bu işin ölkəmizdə yüksək səviyyədə təbliğinə töhfə verir. Tələbələrimin də uğurları məni çox sevindirir. Onlar Amerikada keçirilən müsabiqədə qalib gəldilər. Noyabrda nəticələr açıqlanacaq. Mən də müəllim kimi diploma layiq görüldüm. Təəssüf ki, səhhətimə görə Amerikaya gedə bilməyəcəm. Bu il mənim üçün çox uğurlu oldu.
- Bir müddət əvvəl səhhətinizdə problem vardı. Hazırda özünüzü necə hiss edirsiniz və müalicələriniz davam edirmi?
- Səhhətimlə bağlı müalicələr davam edir. Ayağımdakı problem hələ də qalır. Başqa problemlərim də var, amma onları açıqlamayacam, çünki bizi sevən insanları üzmək istəmirəm. Mənim sağlamlığım üçün çox narahat olurlar. Hazırda ayaq üstəyəm, hərəkət edə bilirəm. Həkimlərimizə təşəkkür edirəm ki, məni qorudular və qorumağa davam edirlər.
- Sentyabrın 18-də Yaşıl Teatrda konsert proqramı ilə çıxış edəcəksiniz...
- Dahi sənətkar Üzeyir Hacıbəylinin 140 illiyi ilə bağlı Yaşıl Teatrda tələbələrimlə birlikdə böyük repertuarla konsertə hazırlaşıram. Hamınızı konsertə dəvət edirəm. Giriş sərbəstdir. Mən özümü Üzeyir bəyin övladı hesab edirəm. Çünki tələbələrindən dərs almışam. Ona görə də bu işi cani-könüldən görürəm.
Bizə dəstək olan Bakı Şəhər İcra Hakimiyyətinin başçısı Eldar Əzizova və komandasına təşəkkür edirəm. Həmçinin Bakı Şəhər Mədəniyyət Baş İdarəsinin rəisi İbrahim Əliyevə, Müslüm Maqomayev adına Azərbaycan Dövlət Akademik Filarmoniyasının
rəhbərliyinə və mədəniyyət naziri Adil Kərimliyə minnətdaram.
Sizə bir şad xəbəri də verim, iki tələbəm - Milana Nəbiyeva və Tamara Əzizova Amerikada böyük bir festivalın laureatı oldular. Noyabrın 9-da "Carnegie Hall" səhnəsində finalda çıxış edəcəklər. Mənim sevincimin həddi-hüdudu yoxdur. Çünki azərbaycanlı gənclər dünya səviyyəsində uğurlar qazanırlarsa, bu, həm onların, həm də Azərbaycanımızın böyük qələbəsidir.
